ASNN – Kapiteni i Italisë, Xhanluixhi Bufon dhe trajneri Antonio Konte, munguan në vlerësimet për të përcaktuar më të mirët e vitit të kaluar, dhe kjo për shkak se portieri nuk ishte i përfshirë në listë. Konte dhe Bufoni iu bindën vendimit të Federatës së tyre, e cila e quajti të papranueshëm faktin që portieri 37-vjeçar nuk ishte në mes të 59 futbollistëve që morën pjesë në garë.
Presidenti Tavekio dhe drejtuesit e tjerë të Federatës Italiane reaguan me një qëndrim të skajshëm, që besohet se nuk ka ndodhur ndonjëherë më parë. Në listën e botuar në faqen zyrtare të FIFA-s, përfaqësuesit italianë mungojnë që të dy. Italianët u ndjenë të ofenduar që në listë ishin pesë portierë, Nojer i Bajernit, De Gea i Mançester Junajtid, Kurtua i Çelsit, Bravo i Barcelonës dhe Ospina i Arsenalit, por jo kapiteni i tyre.
Bufon fitoi titullin kampion në Itali, e Kupën dhe Superkupës së Italisë, si dhe arriti deri në finalen e Ligës së Kampioneve, të humbur përballë Barcelonës. Megjithatë, pavarsisht këtij veprimi, Italia nuk pritet të ketë ndonjë ndëshkim serioz nga FIFA. Organizata më e madhe e futbollit në botë ka probleme shumë më të mëdha për të zgjidhur.
