ASNN – Shefi i klubit “Tomori”, Polizoi Kuqo, e ka quajtur spekulativ lajmin e botuar ditët e fundit në mediat sportive se FIFA i ka hequr tre pikë skuadrës beratase për shkak të mos shlyerjes financiare ndaj futbollistit Jurika Vrucina. Në një prononcim për gazetat sportive të ditës, Kuqo do të deklaronte: “Dua ta mohoj kategorikisht këtë lajm që ka dal së fundmi në mediat e shkruara. Në vitin 2013 na ka ardhur një kërkesë me shkrim nga FIFA, në lidhje me çëshjen “Vrucina”, ku kërkonin gjithë informacionin e plot për këtë futbollist.”
“Në një kohë shumë të shkurtër ne i kthyem përgjigjen në lidhje me kontratën e këtij futbollisti, kjo të përkthyer dhe në gjuhën angleze, një kontratë e cila ishte firmosur nga vetë lojtari, – ka vijuar ai. – Dua të theksoi se në asnjë pikë të kontratës nuk merren përsipër nga klubi shpenzimet mjekësore të lojtarëve. Por ne si humanistë i bëmë rezonancën këtij futbollisti, gjë kjo e cila nuk ka ndodhur me asnjë futbollist tjetër në këtë klub. Vrucina shprehu dëshirën që operacionin ta bënte në shtetin e tij dhe ne nuk mund ta kundërshtonim.”
“Futbollisti iku, por nuk u kthye më, – ka theksuar zyrtari beratas. – Gjithashtu në kontratë shkruhet e zeza mbi të bardhë, nëse një lojtarë largohet pa dijeninë e klubit quhet automatikisht i larguar. Të gjitha këto informacione ia kemi dërguar FIFA-s, po nga e njëjta zyrë që na erdhi kërkesa, duke u konsultuar dhe me juristin e FSHF-së. Pas një viti na vjen përsëri një kërkesë tjetër, e cila i ka ardhur dhe Sekretarit të Përgjithshëm të FSHF-së, Ilir Shulkut, e cila na njoftonte se duhet të bëjmë pagesën financiare për futbollistin sipas kontratës.”
“Të njëjtën dokumentacion i dërgojmë dhe z.Ilir Shulku, ku i kërkojmë ndihmë që FSHF-ja të na mbroj në organet e mësipërme, pasi është futbollisti ai që ka shkelur rregullat e kontratës. Deri në këto momente nuk na është komunikuar asnjë lloj vendimi, përveçse atyre që lexuam në media”, – ka përfunduar shefi i klubit “Tomori”, Polizoi Kuqo.
