ASNN – Triumfon Tentoglu në kërcim së gjati dhe Kamaço-Kuin në garën e 100 m me pengesa. Kështu, greku Tentoglu dhe portorikania Kamaço-Kuin ishin dy kampionët olimpikë të radhës që u kurorëzuan në seancën e paradites së ditë të 10-të të Lojërave Olimpike, që po mbahen në kryeqytetin e Japonisë, Tokio. Në fakt, dita e 10-të e Lojërave Olimpike që po vijnë për sportdashësit drejtpërdrejt në Rrjetin e Radio-Televizionit Shqiptar, ka nisur pas mesnate me orën e Tiranës me seancën e paradites me orën e Tokios, ku janë kurorëzuar edhe dy kampionë të rinj olimpikë.
Në kërcim së gjati, Huan Migel Eçevarria kryesoi përgjatë gjithë garimit, por u mposht pikërisht në fund nga Miltiadhis Tentoglu, që rrëmbeu kështu kurorën olimpike. Kubanezi u përpoq të provonte edhe në kërcimin e fundit, por pësoi një tërheqje muskulore dhe u detyrua të dorëzohej. Ishte një garë dramatike kjo e kërcimit së gjati, ku Eçevarria dhe Tentoglu, arritën të dy të kërcenin 8 m e 41 cm, por greku mori shkallën më të lartë të podiumit falë kërcimit të dytë më të mirë.
Ndërsa medalja e bronztë shkoi kubanezin tjetër, Maikel Maso, i cili gjithashtu u frenua nga dëmtimi dhe u detyrua të kënaqej me 8 metra e 21 cm. Kampioni i botës, Gejl, vuajti gjithashtu një dëmtim, ndërsa suedezi Tobias Montler mendoi se e kishte rrëmbyer kurorën, por e humbi atë për shkelje prej më pak se 2 centimetrash të vijës së kuqe të pedanës. Ndërkaq, një tjetër kampione olimpike që u kurorëzua në seancën e paradites ishte Xhasminë Kamaço-Kuin,.
Ajo mundi rekordmenen botërore, Kendra Herrison, në finalen e 100 m me pengesa për femra, duke u bërë portorikania e dytë që fiton një medalje olimpike. 24-vjeçarja regjistroi kohën 12 sekonda e 37 të qindtat në garën e zhvilluar në Stadiumin Olimpik të Tokios, e ndjekur nga amerikania Herrison, që mbërriti në finish me kohën 12 sekonda e 52 të qindtat, vetëm 3 të qindtat para xhamajkanes Megan Taper, që mori medaljen e bronztë.
Kamaço-Kuin nuk arriti ta përmirësonte rekordin e saj olimpik prej 12 sekondash e 26 të qindtash, që ajo vendosi në gjysmëfinale të kësaj gare më 1 gusht, por i siguroi Porto Rikos medaljen e dytë të artë në histori.
