ASNN – Për herë të parë një finale e rëndësishme luhet me gjyqtarë të huaj, ndërsa treshja malazeze nuk ka lënë asnjë vend për mëdyshje tek humbësit. Flamurtari në basketboll për femra ka marrë dje titullin e 20-të të “kampiones” kombëtare, ndërsa numëron dhe 18 Kupa të Shqipërisë dhe në total ka 38 trofe kombëtarë. Për Flamurtarin ky ishte titulli i katërt radhazi, ndërsa gjithçka është arritur në ndeshjen e 5-të ndaj Goga Basketit.

Një ndeshje me plot emocione dhe me një Pallat Sporti të tejmbushur, ndërsa tifozët vlonjat nuk kanë reshtur së brohorituri për vajzat e tyre. Madje në mbështetje të Goga Basket ka pasur dhe një grup tifozësh të ardhur nga Durrësi. Për herë të parë një finale e rëndësishme e basketbollit shqiptar është gjykuar me gjyqtarë të huaj, të tre malazezë.

Gjë që pas ndeshjes është kontestuar nga Flamurtari, sepse, sipas vlonjatëve, në gjirin e Goga Basket kanë qenë dy lojtare malazeze. Takimi ka nisur i shpejtë dhe me një mbrojtje të fortë të të dy skuadrave, ndërsa gabimet janë të shumta edhe për shkak të emocioneve të kësaj finaleje të fundit të sezonit. Dy pikët e para janë shënuar nga Goga Basket, por Flamurtari merr kontrollin e lojës dhe pjesën e parë e ka mbyllur në epërsi 15-12.

Në 10 minutat e dyta loja ka baraspeshë, ndërsa për herë të parë Goga Basket del për herë të parë në epërsi. Por në pushim, Flamurtari është në epërsi 31-30. Me rifillimin e lojës Flamurtari ka tjetër nivel. Myrto e Zykaj janë të papërmbajtshme nga distanca, Kostallari nuk fal nga poshtë koshit, kurse Plasa e Palko janë mjaft mirë me gjuajtjet për dy pikë. 52-48 në përfundim të pjesës së tretë. Flamurtari dominon në pjesën e katërt dhe duke fituar 23-14.

Ekipi vlonjat e mbyll të gjithë ndeshjen 75-62 dhe meriton titullin “kampion”, të cilin kapitenes Migena Plasa ia ka dorëzuar presidenti i Federatës Shqiptare të Basketbollit, Avni Ponari, së bashku me drejtorin e sporteve në Ministrinë e Arsimit dhe Sportit, Vladimir Gjonaj dhe kryetarin e Bashkisë së Vlorës, Dritan Leli.

Flamurtari – Goga Basket    75-62  (3-2)

(15-12, 16-18, 21-18, 23-14)

Flamurtari: Myrto, Zykaj, Rrapaj, Bleta, Palko / Lloi, Plasa, Hysaj, Kostallari, Hasanaj, Kasaj. Trajner: V. Toska

Goga Basket: Përmeti, Baraj, Turçinoviç, Xhanaj, Memushi / Popoviç, Qypi, Dishnica, Mehmeti, Kumi. Trajner: A. Greva

Gjyqtarë: I. Dragojeviç, Z. Rutesiç, O. Jokiç (Mali i Zi)