ASNN – Tirana kryen “vetëvrasje” ndaj Luftëtarit, një pikë nga dueli direkt i zonës së “ftohtë”. Luftëtari ka rimarrë veten me Julian Ahmatajn dhe po ua sjell “majë hundës” ekipeve rivale në Superiore, pasi në 3 ndeshjet e fundit ka marrë 5 pikë, një fitore e dy barazime. Gjirokastritët ishin sonte përballë Tiranës në stadiumin “Selman Stërmasi”, një ndeshje që prodhoi emocione dhe ankth tek të pranishmit.

Kjo pasi Luftëtari shënoi i pari me anë të Albano Aleksit në minutën e 21-të, i cili shfrytëzoi mjaft mirë korridorin në mbrojtje dhe për të mposhtur më pas portierin Abibi. Ishte një zhgënjim total për Tiranën ky takim, ndoshta nga euforia e javëve të fundit, ku bardheblutë kishin marrë zemër dhe dukeshin të pamposhtur nën efektin e trajnerit Ardian Mema.

Pjesa e parë u mbyll 1-0 për Luftëtarin, një fraksion loje që nxori në pah dobësinë e Tiranës për të shënuar, krejt ndryshe nga duelet e fundit kur sulmi kishte qenë në lartësinë e kërkuar. Nga ana tjetër, u kthye dhe një herë në “skenë” problemi i mbrojtjes që lë hapësira. Sidoqoftë, në pjesën e dytë do të vinte një barazim që lehtësoi frymëmarrjen e Tiranës në renditje.

Për të ardhur tek ai barazim Tirana vuajti shumë dhe ankthi ishte shumë i madh. Luftëtari po fitonte ndeshjen deri në minutën e dytë shtesë, atëherë kur në aksionin e fundit, Meveje gjen nga “hiçi” një gol me peshë për renditjen, pasi jo vetëm çliroi ankthin e mbështjellë për 70 minuta në fushë, por i jep Tiranës një pikë kur dukej se nuk po fitonte asgjë.

Jo vetëm kaq, por duke ndalur në barazim 1-1 Luftëtarin, Tirana e ruan vendin e 7-të në renditje, tashmë me 25 pikë, duke lënë pas vetes Luftëtarin me 22 pikë, por duke mos e shfrytëzuar rastin t’i afrohet ekipeve të mestabelës e t’i largohej përfundimisht zonës së ftohtë të renditjes. Afrimi i Kastriotit në kuotën e 19 pikëve e vë Tiranën dhe Luftëtarin nën presion, kështu që gara e fundtabelës do të vijojë të jetë e fortë deri në fund dhe me shumë pikëpyetje.

Kategoria Superiore

Java e 22-të

Të premten, 15 shkurt 2019:

Teuta – Kukësi                      2-1

Të dielën, 17 shkurt 2019:

Kamza – Kastrioti                  0-1

Flamurtari – Skënderbeu    2-0

Tirana – Luftëtari                   1-1

Laçi – Partizani                     1-0

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        22        14        4            4        23-10              46
2. Teuta              22        10        9            3        28-16              39
3. Kukësi            22        11        5            6        21-13              38
4. Laçi                 22          9        7            6        18-17              34
5. Skënderbeu  22        10        3            9        23-19              33
6. Flamurtari      22          9        6            7        19-15              33
7. Tirana             22          6        7            9        26-24              25
8. Luftëtari         22          6        4          12        19-27              22
9. Kastrioti          22          6        1          15        19-39              19
10. Kamza 22          4        4          14        10-26              16