ASNN – U luajtën dy ndeshjet e para të javës së 7-të të nivelit më të lartë të Kampionatit Kombëtar të Basketbollit për Meshkuj, Superligës, ku ra në sy fitorja e papritur e Tiranës në Sallën Sportive “Fahrie Hoti” në kryeqytet ndaj Goga Basket, të cilën e mundi me rezultatin 87-83. Diferenca e ngushtë e fitores tregon për rivalitetin e madh që pati në këtë ndeshje.

Në fakt, epërsia në lojë luhatej sa në njërin krah në tjetrin, por në fund fitoi Tirana që bën kështu një hap mjaft cilësor në renditje, duke iu larguar zonës së ftohtë dhe duke ngjallur shpresat për një vend në “play-off”-in final. Kjo fitore e ngjit Tiranën në vend të 4-t, me pikë të barabarta me Teutën, nga 10 secila, por kjo e fundit ka një ndeshje për të luajtur.

Ndërkohë, po sonte, Partizani dërrmoi Kamza Basketin në Pallatin e Sportit “Asllan Rusi”, duke fituar me rezultatin 85-66. Diferencat në shifra tregojnë qartë superioritetin e skuadrës së trajnerit Arben Fagu, që jo vetëm nuk e vuri në diskutim fitoren për asnjë çast, por me këtë dypikësh konsolidon dhe më tej pozitat e saj në krye të tabelës së renditjes.

Edhe pse pritej një rivalitet më i madh nga Kamza, për shkak të lojës në rritje të kësaj skuadre gjatë ndeshjeve të fundit, fusha foli për skuadrën e kuqe, që me meritë mban vendin e parë në renditje, me 13 pikë. Të shtunën do të luhet dhe ndeshja e tretë e javës së shtatë të Superligës në basketboll për meshkuj, konkretisht dueli Vllaznia-Teuta, takim që do të luhet në Pallatin e sportit “Qazim Dervishi” në Shkodër.

Durrsakët kanë rastin të barazojnë me pikë Goga Basketin në rast fitoreje, ndërsa për Vllazninë mund të thuhet se pritet me interes debutimi i trajnerit të ri, por edhe shkëndijat e një ringjalljeje që pretendohet nga klubi shkodran.

Kampionati Kombëtar

i Basketbollit – Meshkuj

Superliga

Java e 7-të:

E premte, 23 nëntor 2018:

Partizani – Kamza Basket   85-66

Tirana – Goga Basket          87-83

E shtunë, 24 nëntor 2018:

Vllaznia – Teuta                    (18:00)

Pallati i Sportit “Qazim Dervishi”, Shkodër

Renditja

Nr.       Skuadra                     N.        F.         H.        Pikë

1. Partizani                    7          6          1          13
2. Goga Basket             7          5          2          12
3. Teuta                          6          4          2          10
4. Tirana                         7          3          4          10
5. Kamza Basket          7          2          5            9
6. Vllaznia                     6          0          6            6