ASNN – Tirana e ka nisur me furi vitin 2019, duke regjistruar një fitore të madhe në zonën e ftohtë të tabelës, pasi mundi rivalen e mbijetesës, Kamzën, me rezultatin e thellë 4-1. Në fillim shënoi Kamza, me anë të Sebino Plakut, i cili e çoi skuadrën e tij në epërsi në fraksionin e parë të lojës, duke i dhënë shpresë për fitore dhe largim nga vendet e fundit. Por një karton i kuq në fund të pjesës së parë për Beqirin e ndërlikoi tërësisht ndeshjen për Kamzën dhe i solli pasoja në minutat në vijim.

Deri në këtë moment Kamza ishte psikologjikisht shumë lart dhe Tirana po vuante presionin e disavantazhit. Në pushimin midis dy pjesëve trajneri Ardian Mema merr masat e duhura për sulmin, duke rritur forcën në repartin ofensiv. 11-metërshi i humbur nga Majkëll Ngo në pjesën e parë kishte sjellë tension tek sulmuesi, i cili në pjesën e dytë e përmirësoi ndjeshëm lojën e tij dhe shtyu përpara për t’i dhënë Tiranës epërsi në vijën sulmuese.

Dhe menjëherë sapo nisi pjesa e dytë Tirana u hodh në sulm, por goli do të vonte për shumë minuta. Sidoqoftë, Tiranës iu deshën 15 minuta, midis asaj të 60-të dhe asaj të 75-të, që të përmbyste Kamzën e madje të shënonte 4 gola që do t’i jepnin fitoren e padiskutueshme skuadrës së Memës. I pari që gjeti rrjetën ishte Edon Hasani në minutën e 60-të, i cili barazoi shifrat 1-1. Shënimi i golit çliroi psikologjikisht Tiranën, që, duke qenë edhe me një lojtar më shumë në fushë, e pati më të lehtë përmbysjen.

Majkëll Ngo shënoi golin e dytë në minutën e 66-të, duke i dhënë drejtim fitores bardheblu, ndërsa Hasani shënoi golin e tretë në minutën e 72-të. Kamza hapet për të kërkuar golin dhe kjo rezultoi fatale për të, pasi në minutën e 75-të ishte radha e Dokës që të shënonte golin e “nokautit” në portën e kamzalinjve. Ishte goli i 4-t dhe i fundit i kësaj ndeshjeje dhe Tirana merr tri pikë që e çojnë në 20 pikë gjithsej.

Në vend të 7-të sërish, por tashmë e shkëputur nga ndjekësit. Me këtë ritëm që e nisi të dielën, Tirana mund të pretendojë, pse jo, të kapë grupin e kryesuesve. Në një kampionat si ky, gjithçka mund të ndodhë dhe këtë e vërtetuan ndeshjet Kukësi-Laçi dhe Teuta-Flamurtari.

Kategoria Superiore

Java e 19-të

Të premten, 25 janar 2019:

Skënderbeu – Partizani       0-1

Të shtunën, 26 janar 2019:

Kukësi – Laçi                         0-0

Të dielën, 27 janar 2019:

Luftëtari – Kastrioti                1-5

Tirana – Kamza                     4-1

Teuta – Flamurtari                1-1

Renditja

Nr.       Skuadra         Pikë

1. Partizani        40
2. Kukësi            35
3. Teuta              34
4. Laçi                 31
5. Skënderbeu  30
6. Flamurtari      29
7. Tirana             20
8. Luftëtari         17
9. Kamza            15
10. Kastrioti 13