ASNN – Tirana regjistron disfatën e radhës, Flamurtari shtang Kukësin dhe ngjitet si pretendent. Kategoria Superiore luajti sot dy ndeshje të javës së 11-të të saj, ku në të dy takimet pati surpriza, emocione dhe spektakël në lojë, por me një përfundim të hidhur për Tiranën, e cila regjistroi një tjetër humbje dhe tani pozitat e saj në renditje janë vërtet të ndërlikuara.
Kryeqytetasit pësuan disfatë nga Teuta me shifrat 2-1, në një takim të luajtur sot në stadiumin “Tofik Jashari” të Shijakut. Ai që bëri heroin për durrsakët ishte pikërisht një mbrojtës, Ditmar Bicaj, i cili e përmbysi ekipin bardheblu që po fitonte deri në minutën e 70-të. Si fillim, duhet thënë se ndeshja vonoi në nisje, për shkak të një banderole që tifozët e Tiranës tentuan të ngjisnin në tribuna.
Por nuk u lejuan dhe ndeshja filloi me 12 minuta vonesë deri në heqjen e banderolës dhe nisjen e takimit. Në fakt, Tirana shënoi e para me Edon Hasanin, në minutën e 27-të (më shumë ishte autogol i Shkallës) dhe u duk se po kthehej më në fund tek fitorja. Luajti mirë në shumicën e kohës dhe pati raste të shumta shënimi. Bardheblutë po e dominonin ndeshjen në çdo aspekt dhe ishin superiorë edhe në fillimin e pjesës së dytë.
Por një gol i Ditmar Bicajt, në minutën e 70-të ndryshoi rrjedhën e ndeshjes në mënyrë të pabesueshme. 3 minuta më vonë Bicaj realizoi edhe golin e dytë, duke tronditur keqas Tiranën në një ndeshje ku ajo krijoi vetëbesim dhe kishte shpresë të merrte 3 pikë. Në fund trepikëshi shkoi për durrsakët që ngjiten në kuotën e 18-pikëve, duke iu bashkuar grupit të kryesuesve.
Kategoria Superiore
Java e 11-të
Të premten:
Teuta – Tirana 2-1
Kukësi – Flamurtari 1-2
Të shtunën:
Luftëtari – Laçi (14:00)
Skënderbeu – Kastrioti (17:00)
Kamza – Partizani (17:00)
Renditja
Nr. Skuadrat Pikë
- Skënderbeu 23
- Partizani 22
- Kukësi 19
- Flamurtari 18
- Teuta 18
- Laçi 16
- Tirana 9
- Luftëtari 9
- Kamza 8
- Kastrioti 4
