ASNN – U luajtën sot dy takime të tjera të javës së 14-të të Kategorisë Superiore, ku në mesditë Tirana barazoi 1-1 me Skënderbeun, kurse në mbrëmje vonë, Teuta fitoi 1-0 ndaj Luftëtarit. Në ndeshjen e luajtur, pa praninë e tifozëve, në Stadiumin “Selman Stërmasi” në kryeqytet, u zhvillua një ndeshje e nivelit mesatar, pothuajse e barabartë dhe rezultati i shkoi për shtat lojës që shfaqën të dyja skuadrat. Për korçarët shënoi Bruno Dita në minutën e 35-të.

Ndërsa për Tiranën barazoi Sentamu në minutën e 45-të. Në pjesën e dytë nuk pati ndryshim rezultati, por trajneri Ardian Mema i bardhebluve nuk e fshehu zhgënjimin e tij duke thënë madje se kishte në përbërje lojtarë të papërgjegjshëm, por që ishte i detyruar të menaxhonte grupin me ata lojtarë që kishte në dispozicion. Sa i takon homologut të tij të Skënderbeut, Orges Shehi, ai tha se rezultati i shkoi për shtat ndeshjes dhe se një pikë ishte e pranueshme për skuadrën e tij në këtë përballje.

Në fakt, Skënderbeu nuk arriti të shfrytëzonte ndalesën e Partizanit një ditë më parë që humbi në Vlorë 1-0 ndaj Flamurtarit. Ndërkohë, në mbrëmje, në Durrës, mjaftoi një gol i Kallakut në minutën e 3-të të takimit që Teuta të marrë 3 pikë që e afrojnë ndjeshëm me dy kryesuesit, Partizanin e Skënderbeun, tashmë vetëm 5 pikë larg. Teuta mundi Luftëtarin 1-0 dhe skuadra e trajnerit Bledi Shkëmbi kërcënon tani kreun e renditjes në Superiore.

Të dielën do të luhen dy ndeshjet e fundit të kësaj jave, ajo mes Laçit dhe Kastriotit si dhe dueli Kukësi-Kamza.

Kategoria Superiore

Java e 14-të

Të premten, 23 nëntor 2018:

Flamurtari – Partizani           1-0

Të shtunën, 24 nëntor 2018:

Tirana – Skënderbeu           1-1

Teuta – Luftëtari                    1-0

Të dielën, 25 nëntor 2018:

Kukësi – Kamza                    (14:00)

Laçi – Kastrioti                       (14:00)

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        14        10        1            3        15-6                31
2. Skënderbeu  14          9        3            2        18-7                30
3. Teuta              14          7        4            3        17-11              25
4. Laçi                 13          6        4            3        11-9                22
5. Flamurtari      14          6        4            4        13-10              22
6. Kukësi            13          6        3            4        12-9                21
7. Luftëtari         14          4        1            9        11-16              13
8. Tirana             14          2        5            7        12-17              11
9. Kamza            13          2        2            9          7-17                8
10. Kastrioti 13          2        1          10          9-23                7