ASNN – Përballja me Teutën konsiderohet e fortë nga trajneri i Tiranës, Ardian Mema. Përveçse ka patur lojtarë cilësorë, tek durrsakët kanë ardhur edhe lojtarë të tjerë gjatë merkatos dimërore. Megjithatë, Mema pranon se barazimi nuk e kënaq, ndaj shkojnë në Durrës për fitore.

Te Tirana ekziston një klimë shumë mirë. Vetë fakti që kanë fituar tri ndeshjet e fundit ka bërë që futbollistët të jenë më mirë moralisht. Trajneri i bardhebluve, Ardian Mema e konfirmon këtë fakt, duke nënvizuar se morali i lartë ka sjellë edhe një rregull në ekuilibrat taktikë.

Për përballjen me bregdetarët, Tirana nuk do të ketë në dispozicion Kërçikun, Hasanin dhe Turtulli është në dyshim. Trajneri Mema ka pranuar se këto mungesa e shqetësojnë por kjo nuk do të thotë aspak se ndryshon objektivi i ndeshjes.