ASNN – Është zhvilluar të mërkurën pasdreke takimi i kthimit i çiftit të 3-të të çerekfinaleve të veprimtarisë së dytë të futbollit në vend dhe Tirana e Teuta kanë dhuruar spektakël dhe emocione në “Elbasan Arena”, aty ku janë luajtur 120 minuta lojë dhe është dashur goditja e 11-metërshve për të përcaktuar emrin e skuadrës që do të kualifikohej në gjysmëfinale. Dhe “ruleta” e 11-metërshve i ka buzëqeshur skuadrës bardheblu që është treguar më e saktë nga pika e bardhë, duke fituar me rezultatin 6-5.
Kështu, Tirana është skuadra që është kualifikuar në gjysmëfinalen e Kupës përballë Teutës në “Elbasan Arena”, në takimin që u mbyll me rezultatin 1-1 dhe u vendos vetëm falë 11-metërshve. Sfida nis më mirë për durrsakët, të cilët provuan disa herë, deri sa gjetën golin me anë të Peposhit, i cili nuk gaboi nga pika e bardhë e 11-metërshit në minutën e 28-të. Pjesa e dytë nisi me ritëm të lartë nga të dyja skuadrat, me bardheblutë që u munduan të gjenin rrugën e rrjetës.
Në minutën e 73-të, ata pretenduan dhe për një 11-metërsh, por gjyqtari, pas rishikimit me VAR, e anuloi vendimin e tij të parë për një 11-metërsh, duke shkaktuar shumë polemika. Në minutën e 7-të shtesë të kohës së rregullt ishte Latifi, i cili në frymën e fundit mbajti gjallë shpresën e bardhebluve, duke rivendosur barazpeshën, me takimin që shkoi në dy kohët shtesë nga 15 minuta secila, të cilat gjithashtu nuk prodhuan dot gol.
“Ruleta” e goditjeve nga pika e bardhë u buzëqeshi në fund bardhebluve, të cilët fituan me rezultatin 6-5, ku për ta gaboi vetëm Jonuzi, teksa shënuan Latifi, Mici, Përgjoni, Lulaj, Nikqi dhe Haxhiu. Nga ana tjetër, për durrsakët gabuan Kotobelli dhe Jazxhi, me portierin Kozi, që u kthye në hero. Kështu, Tirana shkon në gjysmëfinalen e Kupës, teksa Teuta tashmë duhet të fokusohet në kampionat, ku vetëm aty mund të shpëtojë sezonin.
