ASNN – Rezonanca magnetike ka zbuluar dje frakturën e pësuar në fytyrë për mbrojtësin e Tiranës Ronald Gërxhaliu. Në një dyluftim me futbollistin e Skënderbeut, Liridon Latifi, gjatë ndeshjes së të hënës, është dëmtuar rëndë mbrojtësi i Tiranës, Ronald Gërxhaliu.
Futbollisti bardheblu është larguar në fund të ndeshjes, kur ka ndjerë probleme në pjesën e poshtme të syrit, pasi fillimisht pa e kuptuar se sa rëndë ishte dëmtuar kishte kërkuar të sakrifikonte duke qëndruar në fushë. Pas ndeshjes, dëmtimi i ish-futbollistit të përfaqësueses së Austrisë ka rezultuar tepër i rëndë.
Dhe, për këtë është dashur t’i drejtohet urgjencës në kryeqytet për të marrë qetësues për hematomën e madhe në pjesën e mollëzës. Dje ai ka kryer disa analiza për të mësuar nëse bëhet fjalë për një dëmtim të rëndë dhe sepse mjekët dyshonin për një frakture në fytyrë.
Më pas, Gërxhaliu ka kryer rezonancën magnetike që do të përcaktonte saktësisht dëmtimin e tij dhe hapat për fazën rikuperuese. Dëmtimi ka qenë i rëndë për futbollistin që pritet të lërë Shqipërisë brenda pak ditëve dhe të udhëtoj drejt Austrisë ku pritet të kryejë një ndërhyrje kirurgjikale.
Mjekët e specializuar në kryeqytet i kanë sygjeruar mbrojtësit bardheblu të operohet sa më shpejt të jetë e mundur. Pas ndërhyrjes Gërxhaliu do të qëndrojë për 2-3 javë pushim absolut për të marrë veten. Nëpërmjet një postimi në faqen zyrtare në Internet, Klubi i Tiranës i ka uruar mbrojtësit shërim sa më të shpejtë dhe kthim sa më të shpejtë.
