Tirana në volejboll për femra ka harxhuar vetëm një orë kohë për të mundur Teutën së cilës i kishin mbetur nga “garda” e vjetër vetëm Begiçi dhe Guza, kurse pjesa tjetër ishin të gjitha lojtare të reja. Madje nëse do të kishte mbajtur ritmin e setit të parë dhe të tretë, që kanë përfunduar me të njëjtin rezultat 25-8, Tirana mund ta kishte mbyllur ndeshjen në një kohë rekord.

Sepse edhe setin e dytë, fituar 25-21, e ka marrë po vetë, në një kohë që durrsaket janë përpjekur të rivalizojnë. Por gjithnjë në këtë set të dytë ka qenë në epërsi Tirana; 8-7, 14-10, 16-14, 21-17, 23-21 dhe në fund 25-21. Përgjithësisht dy skuadra me diferenca të mëdha, ndërsa Tirana vijon të tregojë qëndrueshmëri duke vërtetuar që do të jetë një “kockë e vështirë” për Barletin Volej.

Dhe kjo jo vetëm në finalet e Kupës së Shqipërisë, por dhe në kampionat. Në këtë ndeshje pikëshënuesja më e mirë është Pirra e Tiranës me 12 pikë, ndjekur nga Blloku e Shkurti me 10 pikë. Në bllok si gjithnjë është fituese Nezaj me tre mure të sakta, kurse në shërbim Shkurti me gjashtë rezultative. Në total në tre sete Tirana ka shënuar 75 pikë prej të cilave 63 pikë vetë, kurse 12 pikë kanë ardhur nga gabimet e durrsakeve.

Në krahun tjetër Teuta në tre sete kishte 37 pikë prej të cilave 25 pikë vetë, kurse 12 pikë kanë ardhur nga gabimet e bardhebluve. Në këto kushte, Tirana e ka kthyer ndeshjen me durrsaket në një seancë stërvitore.

Tirana – Teuta           3-0

(25-8, 25-21, 25-8)

Tirana: Blloku, Tuci, Shkurti, Hoxha, Sejfullai (L), Pirra, Nezaj / Agolli, E. Meta. Trajner: A. Gorenca

Teuta: Begiçi, Guza, Rexhepi, Nurja, Dervishi (L), Avdyli, Saliu / Çuka, Hoxha, Disha Trajner: E. Jazenxhiu

Gjyqtarë: E. Preka, V. Sojati (Tiranë)

Ndihmës: L. Nurçe, A. Nurja (Tiranë)

Kampionati Kombëtar

i Volejbollit – Femra

Grupi A1

Java e 9-të

(27-29 shkurt 2016)

Të shtunën:

Flamurtari – Barleti Volej    0-3

Skënderbeu – Vllaznia       3-0

Partizani – Elbasani                        3-1

Të hënën:

Tirana – Teuta                      3-0

Renditja

Nr.       Skuadra         N.        F.         H.        Setet               Pikë

1. Barleti Volej 9          9          0          27-1                27
2. Tirana 9          8          1          25-3                24
3. Skënderbeu 9          7          2          21-10              19
4. Partizani 9          5          4          15-16              15
5. Vllaznia 9          3          6          12-18              10
6. Teuta 9          3          6          12-19              10
7. Elbasani 9          1          8          5-24              3
8. Flamurtari 9          0          9          1-27              0