ASNN – Tirana korri një fitore të madhe të premten në Korçë, përballë Skënderbeut, duke triumfuar 2-1 ndaj Skënderbeut në ndeshjen hapëse të javës së 23-të të Kategorisë Superiore. Ishte një ndeshje me emocion dhe emocionin ia dha prania e një numri të konsiderueshëm tifozësh të Tiranës që e ndezën në maksimum atmosferën. Për trajnerin Ardian Mema ishte një ndeshje e veçantë, pasi më parë ai ka drejtuar bashkë me Ilir Dajën skuadrën korçare.

Dhe Tirana e nisi mjaft mirë takimin, duke qenë racionale në veprime dhe duke ushtruar presion. Ajo që e karakterizon Tiranën e këtyre javëve është besimi i krijuar në vetvete, domethënë Tirana ka aftësinë psikologjike të grupit që pretendon të mundë çdo skuadër që i del përpara. Ishte kjo strategji dhe ky vetëbesim që dhanë efekt edhe në Korçë. Në minutën e 26-të Ishte Kobinah që i hapi rrugën fitores së bardhebluve me golin e tij, një gol që vuri në sedër ekipin e trajnerit Orges Shehi.

E cila nisi të sulmojë me furi në kërkim të golit të barazimit. Dhe ia doli, pa u mbyllur pjesa e parë. Sibo realizoi golin e barazimit në minutën e 45-të, duke balancuar rezultatin dhe duke u dhënë shpresë korçarëve të besonin për një fitore në këtë takim. Në pjesën e dytë skuadrat vijuan të ruanin “llogoret” e tyre, duke u përpjekur nëpërmjet kundërsulmit të gjenin golin i cili do të mbyllte ndeshjen. E kërkuan golin në mënyra të ndryshme, por dukshëm Tirana e kërkoi fitoren deri në fund.

Dhe pikërisht në fund ia doli të shënojë me Majkëll Ngonë, duke marrë 3 pikë që e largojnë përfundimisht nga zona e ftohtë e renditjes dhe e afrojnë me grupin e skuadrave të mestabelës, përfshi dhe vetë Skënderbeun. Korçarët mbeten në kuotën e 33 pikëve, në vend të 5-të, kurse Tirana shkon në 28 pikë, por në vend të 7-të. Emocionet e kësaj fitoreje të madhe i përjetoi më shumë trajner Ardian Mema, i cili u pa duke qarë (nga gëzimi sigurisht) pas golit të fitores.

Një rast prekës, teksa për ta inkurajuar shkoi dhe e përqafoi pikërisht autori i golit Majkëll Ngo.

Kategoria Superiore

Java e 23-të

Të premten, 22 shkurt 2019:

Skënderbeu – Tirana           1-2

Të shtunën, 23 shkurt 2019:

Luftëtari – Teuta                    (14:00)

Partizani – Flamurtari           (17:00)

Të dielën, 24 shkurt 2019:

Kastrioti – Laçi                       (14:00)

Kukësi-Kamza                      (14:00)

Renditja

Nr.       Skuadra         Pikë

1. Partizani        46
2. Teuta              39
3. Kukësi            38
4. Laçi                 34
5. Skënderbeu  33
6. Flamurtari      33
7. Tirana             28
8. Luftëtari         22
9. Kastrioti          19
10. Kamza 16