ASNN – “Ndryshimi tek Tirana, gradual, jo radikal”. Trajneri Erbim Fagu kërkon t’i marrë ndeshjet një nga një, duke nisur nga Laçi. Tirana ndeshet të hënën me Laçin, në takimin e vlefshëm për javën e 25-të të Kategorisë Superiore. Duke folur para kësaj sfide, trajneri bardheblu, Erbim Fagu, ka theksuar se ndryshimi tek bardheblutë do të jetë gradual dhe jo radikal, duke synuar që çdo ndeshje të merret më vete. “Sigurisht, kur ndryshon trajnerët, secili ka filozofinë e tij për futbollin”, – ka thënë ai fillimisht.
“Por, sidoqoftë, nuk është se do të bëjmë ndryshime të mëdha, për faktin se koha është e shkurtër dhe zakonisht ndryshimet e mëdha kërkojnë kohë dhe mund të gabojmë, – ka vijuar trajneri bardheblu. – Por sigurisht do të fokusohemi te disa gjëra të vogla që unë kam parë si në ndeshjet e kaluara, ashtu edhe në ndeshjen e fundit. Në futboll, nuk është se ka një moment për të mundur një skuadër. Për ne është e rëndësishme që nga ky moment e mbrapa të marrim ndeshjet një nga një, duke filluar nga Laçi.”
Erbim Fagu është i ndërgjegjshëm që skuadra e Tiranës ka nevojë për tre pikët. “Nuk ka rëndësi që nuk e kemi mundur në asnjë ndeshje në kampionat rëndësi ka të japim maksimumin dhe marrim 3 pikët që na mungojnë në këto momente, – ka theksuar ai. – Sigurisht, mungesat janë të rëndësishme pasi janë lojtarë të rëndësishëm. Por kam besim shumë të madh edhe te grupi aktual që kemi në dispozicion që do të japin më të mirën dhe do të japin maksimumin.”
Ai theksoi sot para gazetarëve se ekipi i tij duhej të merrte rezultat ndaj Laçit, duke theksuar sidoqoftë: “Nuk mund të krahasoj ndeshjen e Teutës me Laçin, por sinjalet ishin pozitive. Sigurisht, kur unë nuk kisha asnjë ditë stërvitje me grupin. Por siç e kam thënë në ndeshje të tjera, sinjalet ishin pozitive. Mendoj që ajo që është e rëndësishme në këto momente, është të mos kemi ngërç psikologjik sa u përket rezultateve, çdo gjë do vijë hap pas hapi”, – ka përfunduar trajneri i Tiranës, Erbim Fagu.
