ASNN – Në Vlorë u luajt këtë të shtunë kryendeshja e javës së 5-të të Grupit A të Kampionatit Kombëtar të Basketbollit të Femrave, midis Flamurtarit “kampion në fuqi” dhe pretendentes për trofe e këtij sezoni, Shoqatës së Klubit të Basketbollit Femra të Tiranës (SH.K.B.F. Tirana), një ndeshje dramatike ku për të përcaktuar fituesen u desh të luhej edhe koha shtesë. Dhe vetëm pas 5 minutave shtesë, ndeshjen e fitoi skuadra nga kryeqyteti me shifrat 82-79.

Ishte një prej ndeshjeve më të bukura të këtij sezoni, me një rivalitet të madh, me dominim herë të njërës e herë të tjetrës, por dukshëm ekipi i Erdal Borovës dha provat në këtë duel të madh të luajtur në Pallatin e Sportit të qytetit të Vlorës se është më mirë si fizikisht, ashtu dhe teknikisht sesa ekipi i Viron Toskës. Pati momente gjatë lojës ë u duk se Tirana do ta fitonte lehtësisht ndeshjen, duke u shkëputur madje deri në 10 pikë diferencë në pjesën e tretë.

Por në 10-minutëshin e fundit vlonjatet barazuan shifrat 68-68, duke e çuar ndeshjen në shtesë. Ishin minuta spektakolare për të cilat kishte shumë nevojë basketbolli i femrave dhe kjo ndeshje i përmbushi pritshmëritë. Në fund fitoi SH.K.B.F.Tirana, e cila mundi Flamurtarin 82-79, me tri pikë diferencë, por mjaftueshëm për të marrë dy pikë dhe për të marrë e vetme kryesimin e renditjes në kampionatin elitar të femrave. Ndërkohë, Flamurtari mbetet në vend të 4-t, me 7 pikë.

Kuptohet, në kryesim janë dy ekipet e kryeqytetit, ku vendi i parë i takon SH.K.B.F. Tirana të Erdal Borovës, kurse vendi i dytë SH.B.F. Tirana e Mirza Alibegajt. Dy ndeshjet e tjera të kësaj jave, ajo midis Studentit dhe Elbasanit (luajtur të mërkurën më 31 tetor) është mbyllur me rezultatin 84-56, kurse të premten, SH.B.F Tirana mundi Vllazninë me rezultatin 83-54. Ndërkohë, sa i takon grupit B të Kategorisë së Parë, të dielën në Korçë do të luhet ndeshja Skënderbeu-Apolonia, një duel që ka domethënie për vazhdimësinë e këtij sezoni.

Kampionati Kombëtar

i Basketbollit – Femra

Kategoria e Parë

Grupi A

Renditja

Nr.       Skuadra                     F          H         Pikë

1. SH.K.B.F. Tirana      5          0          10
2. SH.B.F. Tirana          4          1            9
3. Vllaznia                     3          2            8
4. Flamurtari                  2          3            7
5. Studenti                     1          4            6
6. Elbasani                    0          5            5