ASNN – Kampionati Kombëtar të Basketbollit të femrave u kthye këtë fundjavë me ndeshjet e javës së 16-të, ku padyshim vëmendja ishte tek derbi i madh në kryeqytet, ai midis Shoqatës së Klubit të Basketbollit Femra të Tiranës së trajnerit Erdal Borova dhe Shoqatës së Basketbollit Femra të Tiranës së trajneres Mirza Alibegaj. Pritej të ishte një duel mjaft i fortë, por në realitet ishte Tirana e Borovës që fitoi me meritë dhe bindshëm, duke mposhtur rivalen e vet bardheblu me rezultatin e thellë 75-59.

Takimi u luajt në Sallën Sportive “Farie Hoti” në kryeqytet. Skuadra e Borovës e interpretoi mirë ndeshjen dhe falë lojtareve të huaja që ka sjellë në merkaton e dimrit ia doli të vendosë diktatin e saj në parket dhe në fund duke e fituar ndeshjen. Kjo fitore e mban SHKBF Tiranën në krye, me 30 pikë, e shkëputur me dy pikë nga Tirana rivale e Alibegajt dhe me 3 pikë nga Flamurtari i vendit të 3-të. Natyrisht, vendimtare për fatet e sezonit do të jetë faza e “play-off”-it.

E cila u jep mundësinë të 4 skuadrave të vendeve të para të lakmojnë titullin nëpërmjet dueleve direkte. Ndërkohë, në kuadër të javës së 16-të, Flamurtari mundi Elbasanin në fushën e këtij të fundit me rezultatin 91-87. Vlonjatet në këtë ndeshje aktivizuan për shumë minuta lojtaret e stolit, për t’u dhënë atyre një mundësi. Edhe pse diferenca me pikë është e vogël, vajzat e trajnerit Viron Toska nuk e vunë në diskutim fitoren dhe morën dy pikë të merituara që i afron me kryesuesit.

Ndërkohë, Vllaznia ka siguruar edhe matematikisht vendin e katërt, pra shkon e sigurt në “play-off”, pasi mundi në kryeqytet, në Pallatin e Sportit “Asllan Rusi” Studentin, me rezultatin 73-68. Ishte një ndeshje e barazpeshuar në tërësinë e saj dhe në fund një fitore me 5 pikë diferencë e vajzave shkodrane që mjafton për “të salduar” vendin e 4-t në renditje.

Kampionati Kombëtar

i Basketbollit – Femra

Kategoria e Parë

Grupi A

Java e 16-të

Të shtunën, 16 mars 2019:

Studenti – Vllaznia                           68-73

Elbasani – Flamurtari                       87-91

Sh.B.F. Tirana – Sh.K.B.F. Tirana 59-75

Renditja

Nr.       Skuadra                     N.        F.         H.        Pikë

1. Sh.K.B.F. Tirana      16        14          2        30
2. Sh.B.F. Tirana          16        12          4        28
3. Flamurtari                 16        11          5        27
4. Vllaznia                     16          8          8        24
5. Studenti                     16          3        13        19
6. Elbasani                    16          0        16        16