ASNN – Të premten janë luajtur ndeshjet e para edhe në Grupin B të fazës eliminatore të Kupës së Shqipërisë në volejboll për femra dhe, sikundër pritej, Tirana dhe Barleti Volej, nuk kanë gabuar në takimet e luajtura në Sallën Sportive “Fahrie Hoti” në kryeqytet. Bardheblutë mundën 3-0 Skënderbeun në “shtëpinë” e tyre, ndeshje me rivalitet vetëm në setin e parë, ku kryeqytetaset vuajtën disi për të mundur mikeshat nga Korça.
Skënderbeu provoi në setin e parë të befasojë Tiranën, duke luajtur mirë, por duket u dorëzuar vetëm në fund, pasi vajzat bardheblu fitojnë 26-24. Më pas, loja kthehet në një formalitet për kryeqytetaset, që fitojnë me lehtësi dy setet e tjera, me të njëjtat shifra, 25-15, dhe marrin 3 pikët e para. Me fitore e ka nisur këtë fazë edhe skuadra e Barleti Volley, që mundi 3-1 Vllazninë, një ndeshje me rivalitet vetëm në dy setet e para, ku të dyja ekipet rivalizuan pikë për pikë.
Kryeqytetaset vuajnë disi për të mundur mikeshat shkodrane në setin e parë, ku triumfojnë 25-22. Vllaznia reagon në setin e dytë, duke fituar 25-21. Por pas këtij momenti, në fushë dominon ekipi i trajnerit Hasan Gurabardhi, që ka komandën e lojës, duke fituar me lehtësi, madje bindshëm, 25-17 dhe 25-8, dy setet e tjera dhe krejt ndeshjen 3-1. Të shtunën luhet sfida kryesore e këtij grupi mes Tiranës e Barleti Volejit, që do të vendosë edhe fatin e kreut të grupit.
Kupa e Shqipërisë
Volejboll – Femra
Grupi B
Dita e parë, 30 nëntor 2018:
Barleti Volej – Vllaznia 3-1
(25-22, 21-25, 25-17, 25-8)
Tirana – Skënderbeu 3-0
(26-24, 25-15, 25-15)
Renditja
Nr. Skuadra N. F. H. Pikë
- Tirana 1 1 0 3
- Barleti Volej 1 1 0 3
- Vllaznia 1 0 1 0
- Skënderbeu 1 0 1 0
Dita e dytë, 1 dhjetor 2018:
Vllaznia – Skënderbeu ora 14:00
Barleti Volej – Tirana ora 16:00
Dita e 3-të, 2 dhjetor 2018:
Skënderbeu – Barleti Volej ora 15:00
Tirana – Vllaznia ora 17:00
