ASNN – Nëse titulli “kampion” në Kategorinë Superiore nuk varet vetëm nga Tirana, Kupa e Shqipërisë është në këmbët e vetë futbollistëve bardheblu të kryeqytetit.

Për të arritur këtë trofe që do të ishte shpëtimi i sezonit, skuadra e drejtuar nga Gugash Magani duhet të kalojë në fillim në gjysmëfinale Laçin.

Sfida e parë do të luhet në “Qemal Stafa” dhe tekniku e di mirë që këto 90 minuta janë shumë të rëndësishme.

Për fatin e keq të bardhebluve, statistikat në përballjet direkte me Laçin në këtë sezon flasin kundër Tiranës.

Për këtë arsye kalimi në finalen e Kupës së Shqipërisë shihet edhe si një revansh për Maganin.

Kundër Laçit, trajneri Magani nuk do të ketë në dispozicion mesfushorin Erando Karabeci.

Sidoqoftë, trajneri peqinas i kryeqytetasve merr lajme të mira pasi Morino dhe Malaj kanë rikuperuar dëmtimet dhe janë gati për të zbritur në fushë.

Në seancën e fundit stërvitore është bashkuar me skuadrën edhe Elis Bakaj, që mund të luajë vetëm në fundjavë kundër Vllaznisë.