ASNN – Moment emocionues në “Enfilld”, tifozët e Bajernit parullë ironike për çmimin e biletave, një mënyrë proteste fine, të cilës iu bashkuan edhe tifozët e Liverpulit. Pikërisht në minutën e 50-të, plasën duartrokitjet e të dy palëve, duke dëshmuar se edhe tifozët më armiq e kuptojnë që çmimi i biletave është i shtrenjtë pavarësisht nivelit të lartë të klubeve dhe të veprimtarisë.

Ishin dy momente që morën vëmendje në këtë protestë të tifozëve bavarezë. E para se çmimi i biletës për tifozët udhëtues, pra ata gjermanë, ishte 55 stërlina, kurse për tifozët anglezë 48 stërlina. Kjo diferencë, në dukje e papërfillshme, është parë si fyerje nga tifozët e skuadrës bavareze. Më pas vinte pjesa e dytë e parullës ku thuhej se lakmia nuk njeh kufij dhe se 20 stërlina do të ishte një çmim që do t’i kishte lënë të kënaqur të gjithë palët.

Ky qëndrim u ka pëlquer mjaft edhe tifozëve të Liverpulit që janë ngritur në këmbë dhe kanë duartrokitur për një minutë rresht, si shenjë respekti dhe miratimi, duke dëshmuar se “armiqtë” bëhen bashkë kur dikush tjetër fut duart në xhepat e tyre. “Bileta për ndeshjen në udhëtim: LFC 48 stërlina. FCB 55 euro. Lakmia nuk njeh kufi! Njëzet është mjaftueshëm”, shkruhej në banderolën që shpalosën në stadium tifozët gjermanë të Bajernit.