ASNN – Së pari, është mungesa e spektaklit, për shkak të moszhvillimit të ndeshjeve dhe së dyti, është ndryshimi i këndvështrimit mbi vlerën financiare të gjithçkaje, në dritën e reflektimit pas krizës së shkaktuar nga epidemia globale e virusit korona. Vlera e transferimeve të lojtarëve të 10 ligave më të forta evropiane mund të zbresë deri në 10 miliardë Euro për shkak të krizës ekonomike të shkaktuar nga “Covid-19”, thotë një studim nga firma ndërkombëtare e kontabilitetit “KPMG”.
Shpenzimet për transferime pritet të bien në mënyrë të ndjeshme, me klubet anembanë kontinentit që janë duke pësuar humbje të mëdha financiare për shkak të ndaljes së futbollit. Ligat në Angli, Gjermani, Itali dhe Spanjë mbeten të përkushtuara për ta përfunduar edicionin në mënyrë që respektojnë kontratat e mëdha me televizionet dhe të minimizojnë goditjet financiare. Por “KPMG”-ja vlerëson se 5 kampionatet më të fortë evropianë, duke përfshirë edhe Francën, që e ka mbyllur edicionin, mund të humbasin 4 miliardë Euro nëse garat nuk përfundohen.
Këto kampionate janë gjithashtu aktorët kryesorë në tregun evropian të shitblerjes së lojtarëve. Studimi mbuloi gjithashtu edhe kampionatet kryesore në Belgjikë, Holandë, Portugali dhe Turqi, si dhe kategorinë e dytë angleze, që njihet si “Çempionship”. Me pak para për t’u shpenzuar, vlerat mund të bien me gati 10 miliardë, nëse nuk ka futboll këtë edicion, që është skenari më i keq. Por ato mund të bien deri në 6.6 miliardë Euro nëse kampionatet luhen me dyer të mbyllura, pa tifozë.
“Analiza jonë e fundit zbulon se vlera e përgjithshme e 4,183 lojtarëve në 10 kampionatet kryesore evropiane në fjalë, ulet në një total prej rreth 10 miliardë Eurosh, çka përfaqëson një rënie prej 26.5% që prej shkurtit në skenarin e parë”, – thekson raporti i “KPMG”-së. “Ndërkaq, vlera e lojtarëve do të zbriste me 6.6 miliardë Euro, një rënie prej 17.7% në skenarin e dytë”, – vazhdon më tej raporti i përpiluar nga firma ndërkombëtare e kontabilitetit.
