ASNN – Kategoria Superiore po vijon të prodhojë emocione. Pas disfatës së Skënderbeut nga Kamza (0-1), që ishte dhe “çudia” më e madhe e javës së 18-të, të shtunën niveli më i lartë i Kampionatit Kombëtar të Futbollit nuk prodhoi surprizë, por një rezultat që vetëm sa shton rivalitetin në grupin e skuadrave të kreut dhe e bën betejën mjaft të vështirë dhe me befasi në renditje. Ndeshja midis Teutës dhe Laçit, e luajtur në Stadiumin “Niko Dovana” të Durrësit përfundoi në barazim 1-1.

Me pak fjalë, të dyja skuadrat morën nga një pikë dhe ruajtën poziciuonet e tyre në klasifikim. Për mënyrën sesi shkoi ndeshja, të dy ekipet mbetën të kënaqur, sepse morën një pikë dhe ajo që e bën më të arsyetuar rezultatin, është se nuk dolën të humbura dhe mbajnë hapur garën për titull. Ndeshjen e vendosën taktikat e skuadrave. Në pjesën e parë ishin kurbinasit që tentuan befasinë dhe ia dolën, pasi Ndriçim Shtubina shënoi në minutën e 38-të.

Ky gol e tronditi Teutën, e cila u gjend e papërgatitur. Javët e fundit Teuta ka pasur ecuri mbresëlënëse dhe kishte krijuar vetëbesim që i jepte siguri për të mposhtur çdo kundërshtar. Por me Laçin ka hasur vështirësi edhe skuadrat e tjera rivale. Laçi është ekipi më i vështirë për t’u mundur këtë sezon të Superiores, ky është padyshim fakt. Në pjesën e dytë Teuta e rriti ndjeshëm volumin e lojës dhe krijoi shumë raste. Bëri maksimumin e saj për të arritur përmbysjen.

Por në fund u kënaq me një pikë, sepse realizoi vetëm golin e barazimit. Dhe atë ia doli falë një “Sherifi” , i cili ka shkëlqyer javët e fundit, duke spikatur si një prej talenteve të rinj të kampionatit tonë. Bëhet fjalë për Sherif Kallakun, i cili rezultoi përcaktues edhe në ndeshjen e sotme, duke shënuar golin e barazimit 1-1 dhe i dha Teutës një pikë me vlerë nga kjo përballje. Barazimi bëri që Teuta të qëndrojë në vend të dytë por tani me 33 pikë.

Vetëm 3 më pak se Partizani kryesues, por të kuqtë kanë një ndeshje për të luajtur të dielën në Gjirokastër. Ndërkohë, Laçi mori një pikë nga barazimi i sotëm në Durrës dhe shkoi në 30 pikë, por mbetet në vend të pestë, me pikë të barabarta me Skënderbeun e vendit të katërt.

Kategoria Superiore

Java e 18-të

Të premten, 14 dhjetor 2018:

Kamza – Skënderbeu          1-0

Tirana – Flamurtari               1-0

Të shtunën, 15 dhjetor 2018:

Teuta – Laçi                           1-1

Të dielën, 16 dhjetor 2018:

Luftëtari – Partizani              (13:30)

Kukësi – Kastrioti                  (13:30)

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        17        11        3            3        18-8                36
2. Teuta              18          9        6            3        24-13              33
3. Kukësi            17          9        4            4        16-9                31
4. Skënderbeu  18          9        3            6        20-13              30
5. Laçi                 18          8        6            4        16-13              30
6. Flamurtari      18          8        4            6        15-12              28
7. Tirana             18          4        5            9        19-21              17
8. Luftëtari         17          5        1          11        14-20              16
9. Kamza            18          4        3          11          9-20              15
10. Kastrioti 17          3        1          13        11-33              10