ASNN – Teuta ia ka dalë dhe në fushën e vështirë të Korçës, teksa ka fituar dje me 9 pikë diferencë ndaj Skënderbeut vendas. 74-65 ka qenë rezultati përfundimtar i ndeshjes për djemtë e trajnerit durrsak, Bekim Abrazhdës, ndërsa kështu vijojnë rrugën drejt ngjitjes në Superligën e Kampionatit Kombëtar të Basketbollit për Meshkuj. Në përgjithësi ka qenë një ndeshje me rivalitet, por që në fund ka triumfuar aftësia e durrsakëve, që sivjet duken të sigurt në ngjitjen e tyre në elitën e basketbollit shqiptar. Niveli i dytë i Kampionatit Kombëtar të Basketbollit për Meshkuj, që njihet si Kategoria e Parë, e ka luajtur të shtunën takimin e parë të javës së 9-të, duke dëshmuar konkurrencën e madhe që e ka karakterizuar këtë grup prej 4 skuadrash. Kjo sepse Elbasani është rikthyer në vallen për një vend në Superligë, duke mundur Studentin 64-61 dhe duke u barazuar në renditje me kryeqytetasit, me nga 14 pikë, dy më pak sesa Teuta kryesuese.
Në ndeshjen e Elbasanit, diferencën për vendasit e ka bërë pjesa e parë dhe ajo e tretë, të cilat skuadra e Arben Xhyrës i ka fituar përkatësisht 21-13 dhe 25-15, duke krijuar një epërsi komode. Ndonëse skuadra e trajnerit të ri, Henri Moja, është kundërpërgjigjur duke fituar 10-minutëshin e dytë, 12-7, dhe sidomos atë të katërtin 21-11, kjo nuk i ka mjaftuar Studentit të shmangë humbjen 61-64.
Ndërkaq, Federata Shqiptare e Basketbollin ka ngushëlluar familjen Osmani në Shkodër për humbjen e të afërmit të tyre, Skënderit. Ish-anëtar i kombëtares shqiptare, ish-lojtar i Vllaznisë, trajner, gjyqtar dhe kontributi i tij ka qenë shumë i madh në basketbollin vendës. AlbanianSport.com u bashkohet këtyre ngushëllimeve për këtë humbje të koshit dhe sportit shkodran.
Kampionati Kombëtar
i Basketbollit – Meshkuj
Kategoria e Parë
Java e 9-të
(28 shkurt-1 mars 2015)
Të shtunën:
Elbasani – Studenti 64-61
Të dielën:
Skënderbeu – Teuta 65-74
Renditja
Nr. Skuadra N. F. H. Psh-Pp Pikë
- Teuta 9 7 2 647-551 16
- Studenti 9 5 4 585-558 14
- Elbasani 9 5 4 597-616 14
- Skënderbeu 9 1 8 542-644 10
