ASNN – Basketbolli i meshkujve u kthye këtë fundjavë me ndeshjet e javës së 5-të të tij, ku nuk munguan emocionet e rivaliteti. Kështu, në periferinë e kryeqytetit Kamza Basket u përpoq të regjistronte një fitore me peshë për të ardhmen e saj në këtë kampionat, por nuk ia doli. Përballë pati Goga Basket, ndaj së cilës humbi me rezultatin 73-82 në takimin e zhvilluar në Sallën Sportive të Bathores.
Ishte një ndeshje me rivalitet dhe këtë e tregojnë edhe afërsia me pikë ndërmjet dy ekipeve, por diferencën e bënë miqtë nga Durrësi që ditën ta menaxhonin epërsinë e krijuar në fillim. Falë një grupi më cilësor dhe një përqendrimi më të madh, Goga Basket ia doli të fitojë e të mbetet në 3 vendet e para të renditjes, me 9 pikë, po aq sa ka edhe Teuta, që kryeson falë pikëavarazhit më të mirë.
Pikërisht Teuta regjistroi një fitore bindëse e me vlerë për këtë fazë të kampionatit, pasi mposhti thellësisht Tiranën me rezultatin 95-66, duke merituar plotësisht suksesin. Gati 30 pikë diferencë tregojnë qartë epërsinë e skuadrës durrsake dhe inferioritetin e Tiranës. Në këtë ndeshje nuk pati kurrfarë rivaliteti dhe emocioni, pasi diferencat midis dy skuadrave ishin të ndjeshme.
Me këtë fitore Teuta mban kreun e renditjes me 9 pikë dhe pret e qetë duelin e së shtunës midis Vllaznisë dhe Partizanit, që luhet në Shkodër në orën 18:00. Çfarëdo të ndodhë, Teuta mban kryesimin, shoqëruar me pikë të barabarta nga Goga Basket. Janë dy skuadra nga Durrësi këtë sezon që po i japin tonin basketbollit të meshkujve, ndërsa ka një rënie të peshës së ekipeve të kryeqytetit.
Kampionati Kombëtar
i Basketbollit – Meshkuj
Superliga
Java e 5-të:
Të premten:
Kamza Basket – Goga Basket 73-82
Teuta – Tirana 95-66
Të shtunën:
Vllaznia – Partizani (18:00)
Renditja:
Nr. Skuadrat Pikë
- Teuta 9
- Goga Basket 9
- Partizani 7
- Tirana 7
- Kamza Basket 6
- Vllaznia 4
