ASNN – Java e tretë e nivelit më të lartë të Kampionatit Kombëtar të Basketbollit për Meshkuj, që njihet si Superliga, u kthye në parket, këtë herë me ndeshje vërtet interesante dhe derbi. Kjo javë nisi që të premten me një ndeshje derbi të fundtabelës, ku Vllaznia priti Kamza Basketin në Pallatin e Sportit “Qazim Dervishi”. Pritej një reflektim i shkodranëve dhe një reagim i tyre për pozitat e dobëta në renditje, por nuk ndodhi kështu.

Derbin e fundtabelës e fitoi Kamza Basket, që mori fitoren e parë këtë edicion. Miqtë triumfuan me rezultatin 75-70, në një takim ku shkodranët fituan vetëm pjesën e parë me shifrat 26-19, ndërsa të tre pjesët e tjera të lojës i fitoi Kamza Basket, përkatësisht me shifrat 25-19, 13-11 dhe 18-14. Pas kësaj fitoreje Kamza ngjitet përkohësisht në vendin e 3-të me 4 pikë, kurse Vllaznia mbetet në vend të fundit me tri pikë. Theksojmë se në këtë ndeshje trajneri Fatjon Taraboshi i Vllaznisë shfaqi mjaft ankesa ndaj gjyqtarëve të ndeshjes.

Ndërkohë, të shtunën është luhet në Durrës derbi i vecantë, ai midis Teutës dhe Goga Basket, një duel që u zhvillua në pallatin e sportit “Ramazan Njala”. Dy skuadrat zhvilluan sot në mbrëmje në “Ramazan Njala” ndeshjen e parë derbi të Durrësit në histori, takim që u fitua nga Teuta me rezultatin 90-80. Një përballje emocionuese dhe me rivalitet, ku nuk mungoi spektakli e lufta e fortë sportive, madje edhe tensioni (4 lojtarë dolën me teknike përjashtimi).

Ndeshja ishte e hapur deri në fund, me Teutën që gjatë gjithë ndeshjes pati një epërsi të lehtë prej 4-5 pikësh, duke bërë që emri i fituesit të jetë në dilemë. Goga Basket tentoi të surprizojë Teutën, por pa sukses, pasi gaboi atëherë kur nuk duhej. Pjesa e katërt është ajo që dhuroi gjithçka, emocionet e dramacitetin, tensionin e grintën, me Endrit Hysenagollin që është protagonist me 28 pikët e realizuara për Teutën.

Pas këtij takimi, të dyja ekipet ndajnë kreun me nga 5 pikë secila. Për Goga Basket kjo është humbja e parë me të rriturit, pasi vjet i fitoi të gjitha takimet në Kategorinë e Parë. Java e tretë e basketbollit të meshkujve do të mbyllet të dielën me një superndeshje derbi, midis Partizanit dhe Tiranës, takim i planifikuar të luhet në Pallatin e Sportit “Asllan Rusi” në kryeqytet.

Kampionatit Kombëtar

i Basketbollit – Meshkuj

Superliga

Java e 3-të

Të premten:

Vllaznia – Kamza Basket    70-75

Të shtunën:

Teuta – Goga Basket            90-80

Të dielën:

Partizani – Tirana                 (19:00)

Renditja

Nr.       Skuadra                     Pikë

1. Goga Basket             5
2. Teuta                          3
3. Partizani                    4
4. Kamza Basket          4
5. Tirana                         3
6. Vllaznia                     3