ASNN – Dueli i bregdetarëve me Shamrok Rovers vjen drejtpërdrejt në RTSH Sport (20:00). Teuta luan sonte ndeshjen e kthimit të turit të 3-të të Ligës së Konferencës me Shamrok Rovers, teksa është mundur 0-1 në Irlandë para një jave. Ndeshja e sotme do të sillet për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport, duke nisur nga ora 20:00.

Dhe zëvendëstrajneri i Teutës, Bledar Hodo, ka premtuar maksimumin për të kërkuar kualifikimin. Edhe kapiteni i Teutës, Renato Arapi është në të njëjtën linjë me zëvendëstrajnerin e tij. Ndërkaq, trajneri i Shamrok Rovers, Stefen Bradli ka deklaruar se “do të jetë një tjetër Teutë në ndeshjen e kthimit, një Teutë që sulmon dhe që do ta synojë përmbysjen”.

Sidoqoftë, ai thekson se skuadra e tij është gati për çdo skenar. “Unë pres pikërisht që të kemi një ndeshje krejt tjetër nga ajo që pamë javën e shkuar, por ne do të jemi gati për ta, – tha trajneri i 18-herë kampiones dhe 25-herë fitueses së Kupës së Irlandës. “Nëse ata luajnë në sulm, ne do t’u përgjigjemi me të njëjtën monedhë”, – shtoi ai.