ASNN – Pukjanët duket se janë në delir pas asaj fitoreje të madhe në Stadiumin “Redi Maloku” të Fushë-Krujës, teksa kanë përmbysur nga 0-2 në 4-2. Tërbuni është shoqëruar edhe shoqata e tifozëve “Shqiponjat e Veriut”, ndërsa dje, në faqen e “Facebook”-ut të KF Tërbunit, ata kanë falënderuar tifozët e Ilirisë për mikpritjen.
“Jo vetëm kaq, por i falënderojmë për respektin që treguan ndaj nesh dhe skuadrës sonë, – shkruanin tifozët pukjanë në postimin e tyre në rrjetin social në fjalë. – Pasi për asnjë moment ata nuk kanë ofenduar dhe e pranuan rezultatin të qetë, edhe pse ishte me përmbysje.”
“Gjithashtu dhe forcat e policisë në Fushë-Krujë janë treguar korrekte, ndërsa në fakt, kudo që shkojmë, nuk e gjejmë një polici të tillë. Ndaj ju bëjmë thirrje të gjithë qytetarëve tanë, por dhe policisë së Pukës, që të jetë korrekte në sjellje dhe mirëkuptuese me të gjithë”, – kanë përfunduar tifozët, kurse Tërbuni i Plorit, në tre javë, ka 7 pikë.
