ASNN – Novak Gjokoviçi largohet nga Turneu i Hapur Amerikan (US Open). Problemet në shpatull nuk e kanë lejuar numri 1 në botë të përfundojë ndeshjen ndaj Sten Vavrinkës. Ndërkaq, çerekfinalet e turneut amerikan kalojnë Federer dhe Medvedev. Te femrat kualifikohen për më tej Svitolina dhe Serena Uilliams. Novak Gjokoviçi provon deri në maksimum, por në fund iduhet të tërhiqet për shkak të dhimbjes në shpatull, e cila e ka shoqëruar gjatë këtyre ditëve në turneun njujorkez.
Tenisti serb u detyrua të tërhiqet në turin e 16-shes përballë Vavrinkës, që në fakt ishte duke fituar 2-0 (6-4, 7-5), e seti i 3-të ishte po për të, 2-1. turneu amerikan humbet kështu kampionin në fuqi dhe favoritin numër 1 për ta fituar sërish trofeun. “Tani më duhet të konsultohem me mjekun dhe skuadrën time për të kuptuar se si mund ta shërojmë shpatullën”, – ka thënë Novak Djokovic pas largimit nga “US Open”. – Mendoj të marr një periudhë pushimi për të vlerësuar dëmtimin.”
Në çerekfinale Vavrinka do të ndeshet me Danil Medvedevin, pasi rusi ka mundur gjermanin Kopfer 3-1. Medvedevi, i cili është nën kujdesin e mjekëve për një problem në shpatull, kalon kështu për herë të parë në çerekfinalet e “US Open”. Edhe Rozher Federeri ka mbërritur në çerekfinalet e turneut amerikan. Ka qenë një fitore tepër e lehtë për zviceranin ndaj belgut Gofë’, të cilin e ka mundur në 3 sete, 6-2, 6-2, 6-0 për gati një orë e 19 minuta lojë.
Federeri bën lojën e tij të zakonshme, pa shumë sforcime, kundrejt një kundërshtari që detyrohet të bëjë shumë gabime. Ndërsa goditjet spektakolare të Federeri kanë kënaqur spektatorët në shkallët e fushave të turneut njujorkez. Kundërshtari i tij në çerekfinale do të jetë Dimitrovi, që ka mundur 3-0 australianin De Minaur. Në konkurrimin për femra, vazhdon rrugën në çerekfinale, Svitolina që fiton 2-0 me sete (7-5, 6-4) ndaj Kijs. Tenistja amerikane ka bërë gabime atëherë kur nuk duhej, për shkak të mungesës së përvojës dhe mospërqëndrimit, pikërisht në pikët e fundit të setit vendimtar.
Kundërshtarja e radhës për Svitolinën do të jetë Konta, e cila eliminoi Pliskovan. Kjo e fundit nuk ka qenë në kushtet më të mira fizike, teksa ka patur probleme në kofshën e majtë. Turin e 16-shes e kalon edhe Serena Uilliamsi, që fiton 2-0 ndaj kroates Martiç, megjithë problemin që ka ndjerë në kavilje, në përpjekje për të kapur një top në vijën fundore.
