ASNN – Në fillim mendohet vetëm përkohësisht, por, duke parë moshën që ka, mund të mos vonojë edhe përfundimisht. Rozher Federeri mund të largohet nga tenisi. Pas operacionit të fundit në gju, ai mendon se kjo gjë mund ta pengojë në vazhdimin e karrierës së tij në tenis. Faza e rikuperimit duket e gjatë dhe ai, së bashku me stafin e tij, kanë menduar rikthimin në fushë në 2021. Federeri e pranoi se gjatë ndërprerjes për shkak të virusit korona dhe pas dy operacioneve që iu nënshtrua në gju, ai e konsideroi mundësinë e ndërprerjes së karrierës së tij.
Por në fund vendosi të vazhdojë të luajë. “Ka qenë një moment i rëndësishëm për mua, me epideminë e virusit korona dhe dy operacionet e gjurit që kam pasur, për të marrë parasysh nëse vërtet mund ta vazhdoj karrierën time, – ka rrëfyer zvicerani. – Do të kishte qenë e lehtë për mua të thoja që do të tërhiqem tani, por rikthimi është një rrugë e gjatë dhe unë duhet të jem i durueshëm deri në shërimin tim. Sa i përket virusit “Covid-19”, mendoj se kjo është koha e përshtatshme për të reflektuar.”
“Të gjithë të kujtojnë se çfarë është më e rëndësishme dhe thelbësore në jetë: familja, miqtë, shëndeti”, – shtoi tenisti helvet, i cili shprehu gjithashtu keqardhjen që turneu i “Uimbëlldonit” nuk mund të zhvillohej këtë vit, duke qenë një nga turnetë e tij të preferuar dhe ku ai do të kërkojë titullin e tij të 9-të në 2021. “Më vjen keq që nuk do të luhet sivjet turneu i Uimbëlldonit”, – ka thënë Federeri. – Por më vjen mirë që po kaloj më shumë kohë me famijen time, për herë parë pas 25 vitesh karrierë.”
“Po vazhdoj gjithashtu me rehabilitimin çdo ditë”, – ka shtuar tenisti, që në fillim të gushtit mbush 39 vjeç. – Një tjetër nga qëllimet e Rozher Federerit është Olimpiada e Tokios, ku ai do të kërkojë medaljen e artë në konkurrimin individual. Sidoqoftë, të gjitha këto mbeten për t’u parë nëse do të mund të realizohen nga ana e tenistit zviceran. Sepse në fund të fundit, mosha bën të vetën.
