ASNN – Rafael Nadal e ka nisur mirë turneun amerikan duke mundur 3-0 numrin 60 në botë, australianin Xhon Millman. Surprizë ka qenë eliminimi i 4 tenistëve, që në turin e parë, të cilët renditen midis 10 më të mirëve në botë. Sepse nga “US Open” largohen Timi, Tsitsipasi, Kaçanovi dhe Bautista. Me shumë vështirësi kualifikohet për më tej Zverevi. Kështu, gjithçka po shkon sipas parashikimeve. Rafael Nadali ndjek Novak Gjokoviçin e Rozher Federerin, duke kaluar në turin e dytë të Turneut të Hapur Amerikan (US Open).
Tenisti spanjoll ka mundur me lehtësi Millman, numrin 60 në botë, me rezultatin 3-0, me sete, 6-3, 6-2 e 6-2. Një provë e mirë kjo e Nadalit, numrit 2 në botë, që arriti të kishte kontrollin e ndeshjes gjatë gjithë kohës. Tashmë mëngjarashi spanjoll do të përballet me Thanasi Kokinakisin. Por nëse fitorja e Nadalit, nuk ka çuditur njeri, i papritur ka qenë eliminimi i numrit 4 të botës, Dominik Timit. Në turin e parë të “US Open”, ai është mundur nga Tomas Fabiano 3-1. Largohet nga skena e “Flashing Medows” edhe Stefanos Tsitsipas, që konfirmon kështu periudhën jo të mirë që po kalon.
Ai është mundur nga Andrej Rublev me rezultatin 3-1. Por eliminimi në turneun amerikan i tenistëve që renditen midis 10 më të mirëve në botë ka vazhduar me Karen Kaçanovin, numri 9 në botë. Ai është mundur nga Vasek Pospisili, i 216-ti në renditjen e ATP-së. Tenisti kanadez ka fituar 3-2. Po kështu, seti i fundit ka qenë fatal edhe për Roberto Bautistan, numrin 10 në botë. Ka qenë Mikail Kukushkini ai që e ka mundur 3-1. Listës së të eliminuarve mund t’i bashkohej edhe Aleksandër Zverevi. Tenistit gjerman iu desh seti i 5-të për të siguruar fitoren 3-2 ndaj moldavit Radu Albot.
Në konkurrimin e femra, numrit 1 në botë, Naomi Osakas, i është dashur seti i tretë për mundur rusen Ana Blinkova, 6-4, 6-7, 6-2. Debutim drithërues edhe për Simona Halepin, numri 4 në renditjen botërore, që fiton me vështirësi 2-1 me Nikolë Gibsin. Kurse Petra Kvitova fiton 2-0 ndaj bashkëkombases së saj Denisa Allertova. Fitore kanë arritur edhe Kiki Bertens dhe Kori Gauf.
