ASNN – Serbi triumfon në 5 sete ndaj zviceranit Rozher Federer në finalen maratonë prej 4 orësh e 57 minutash. Ndryshe nga finalja e femrave të shtunën, që zgjati më pak se një orë, ka qenë një betejë epike finalja e meshkujve të dielën në turneun e famshëm të tenis, “Uimbëlldonit”. Dhe Novak Gjokoviç ka triumfuar në 5 sete, pas plot 4 orësh e 57 minutash ndaj Rozher Federerit, duke mbrojtur kështu titullin e fituar vjet. Sikundër i gjithë ky turne, edhe kjo finale maratonë u soll për sportdashësit drejtpërdrejt nga Rrjeti i Radio-Televizionit Shqiptar.
Ishte një gabim i pazakontë nga ana e një dore të sprovuar si ajo e thuajse një 38-vjeçari ajo që do të ndalte kohën pas plot 4 orësh e 57 minutash dhe do të vendoste fatin e një finaleje që padyshim do të hyjë në histori. Novak Gjokoviç ka dy herë humbjen në pikën e fundit, duke arritur të triumfonte në 5 sete në një finale të jashtëzakonshëm të një turneu të veçantë dhe historik të tenisit si ai i Uimbëlldonit, kundrejt rivalit të tij Rozher Federer.
Në fushën qendrore të këtij kompleksi tenisi në Londër, ku atmosfera më tepër i ngjau një ndeshjeje futbolli sesa një ndeshjeje tenisi, Gjokoviçi fitoi me shifra 7-6 (7-5), 1-6, 7-6 (7-4), 4-6 dhe 13-12 (7-3). Tenisti serb, aktualisht nr. 1 i renditjes botërore, ka fituar tanimë 16 tituj të turneve madhorë, të njohur ndryshe si “Grend Slem”-e, ndërsa ia ka dalë të mbrojë me sukses titullin e fituar vjet dhe i ka bërë tanimë 5 trofetë e fituar në turneun e “Uimbëlldonit”, duke u barazuar kështu me një legjendë si Bjorn Borgu.
Ndërkaq, Federeri, i cili mbush në fillim të muajit të ardhshëm 38 vjeç, kërkonte të 9-tin titull në Uimbëlldon, duke barazuar kështu rekordin historik të këtij turneu, ndërsa mbetet në kuotën e 20 titujve të turneve madhorë, “Grend Slem”-eve. Sikundër i gjithë ky turne prestigjioz, edhe emocionet e jashtëzakonshme dhe të pafundme të kësaj finaleje maratonë, u sollën për sportdashësit drejtpërdrejt nga Rrjeti i Radio-Televizionit Shqiptar.
