ASNN – Një tjetër takimi i barazpeshuar i javës së 22-të të Kategorisë Superiore që luhet sonte është edhe i kryeqytetit, midis Partizanit dhe Kukësit.
Kjo ndeshje, që do të luhet në Stadiumin Kombëtar “Qemal Stafa”, do të sillet për sportdashësit drejtpërdrejt nga Rrjeti i Radio-Televizionit Shqiptar.
Të kuqtë kryeqytetas, të cilët janë eliminuar në mesjavë nga Kupa e Shqipërisë, tanimë mbajnë vendin e dytë të renditjes, me 45 pikë, 4 pikë prapa Skënderbeut kryesues, ndërsa Kukësi mbetet në vendin e 5-të, me 32 pikë.
Verilindorët janë edhe në gjysmëfinale të Kupës së Shqipërisë dhe synojnë ta arrijnë Evropën në të dyja mënyrat.
Të dy presidentët e ekipeve kanë premtuar shpërblime të majme për skuadrat përkatëse në rast fitoreje, ndërsa trajnerët përkatës e kanë në dispozicion të gjithë kontingjentin e lojtarëve.
