ASNN – Pas përfundimit të sfidave çerekfinale ku u përcaktuan 4 ekipet gjysmëfinaliste të Kupës së Shqipërisë, skuadrat do të zbresin në fushë të dielën dhe të hënën për të luajtur javën e fundit të fazës së 3-të, atë të 27-ën e Kategorisë Superiore të Kampionatit Kombëtar të Futbollit.
Të dielën do të luhen dy takimet e para, Erzeni-Partizani dhe Tirana-Egnatia. Duke nisur nga ora 14:00, shijakasit do të përballen me të kuqtë e kryeqytetit në Stadiumin “Egnatia Arena” të Rrogozhinës, ndërsa duke nisur nga ora 17:00, bardheblutë do të luajnë ndaj kryesueses së kampionatit, në Stadiumin “Elbasan Arena”.
Të hënën do të luhen 3 takimet e tjera të javës së 27-të. Kukësi-Laçi është sfida e parë e ditës, që do të zhvillohet pasdreke, duke nisur nga ora 14:00, në Stadiumin e qytetit verilindor. Ndërsa duke nisur nga ora 17:00, do të luhen dy takimet e tjera, Dinamo City-Teuta në Durrës dhe Skënderbeu-Vllaznia në Korçë.
