ASNN – Java e 9-të e Kategorisë Superiore, që përkon me javën e fundit të fazës së parë të Kampionatit Kombëtar të Futbollit, do të nisë të shtunën në mesditë me dy ndeshje, për të vijuar të dielën me dy takime të tjera e për t’u mbyllur të hënën në Vlorë me kryendeshjen Flamurtari-Tirana. Të dielën do të luhen dy ndeshje interesante dhe, në Korçë, Skënderbeu do të presë Kamzën.

Të dy ekipet vijnë nga një krizë e brendshme dhe emëruesi i përbashkët është kriza financiare. Në të dy kampet lojtarët ankohen se nuk kanë marrë rrogat e prapambetura, pavarësisht se drejtuesit e mohojnë krizën dhe deklarojnë fitoren (në një vend ku ka plot çudira, pse të mos prodhojë çudi dhe Kamza).  Ndërkaq, Partizani-Luftëtari do të luhet gjithashtu të dielën, në orën 17:00 në Stadiumin “Selman Stërmasi”.

Do të jetë një përballje e vështirë për të kuqtë, pasi gjirokastritët me trajnerin Mezani kanë treguar se nuk thyhen lehtë. Natyrisht, pretendent mbetet Partizani dhe këtë herë ka shansin të thellojë statistikat e tij dhe të shkëputet në kryesim. Siç e përmendëm që në fillim, java e 9-të e Superiores do të mbyllet të hënën me ndeshjen Flamurtari-Tirana, një ndeshje ku trajneri Ilir Daja do të përballet me ish-ndihmësin e tij Ardian Mema.

Asnjërës skuadër nuk i intereson barazimi, prandaj pritet të jetë një duel i zjarrtë në Vlorë, ku të dy kampet kanë objektiv trepikëshin. Kjo javë e fundit e fazës së parë do të “verifikojë” përfundimisht se cilat skuadra janë për titull e cilat kanë për mbijetesë, megjithëse ky fakt është përvijuar pak a shumë në mënyrë të qartë gjatë javëve të fundit.

Kjo, sepse skuadrat janë ndarë në dy grupe, ku gjysma janë pretendentë e gjysma tjetër do të luftojnë për të qëndruar në Kategori. Dy skuadra që ende nuk kanë treguar se në cilin grup bëjnë pjesë janë Tirana e Teuta, prej të cilave pritej shumë, realisht shumë, por kanë zhgënjyer në fazën e parë.

Kampionati Kombëtar

i Futbollit 2018-2019

Kategoria Superiore

Java e 10-të:

Të shtunën:

Kastrioti – Kukësi      (14:00)

Laçi – Teuta               (14:00)

Të dielën:

Skënderbeu-Kamza            (14:00)

Partizani-Luftëtari    (17:00)

Të hënën:

Flamurtari – Tirana   (18:00)

Renditja

1. Partizani 19
2. Skënderbeu 17
3. Laçi 16
4. Kukësi 13
5. Flamurtari 11
6. Teuta 11
7. Tirana   8
8. Kamza   7
9. Luftëtari   6
10. Kastrioti 4