ASNN – Federata Shqiptare e Taekuondosë në versionin “World”, me President Gentian Nanon dhe Sekretar të Përgjithshëm Arben Markajn, ka zhvilluar veprimtarinë e parë të vitit 2018. Bëhet fjalë për Kampionatin Kombëtar të Të Rriturve dhe të Të Rinjve, i cili, për herë të parë në vitet e fundit, ka ndërruar strehë. Është zhvilluar në kushtet komode të Sallës së Lojërave me Dorë “Feti Borova” në Parkun Olimpik të Tiranës, ndërsa sipas Sekretarit të Përgjithshëm i Federatës Shqiptare të Taekuondosë (World), Arben Markaj, në të kanë marrë pjesë 93 sportistë.

Ato kanë përfaqësuar 17 skuadra. Tek të rinjtë titullin “kampion” e ka merituar “Top Gym Sport” i Leonidha Kaprit, ndërsa pas tij janë renditur “Gladiator”, me trajner Angjelin Mrrukun dhe Studenti me trajner Xhevahir Hysa. Për të rritur, konfirmohet Tirana si “kampione”, e cila drejtohet nga Arjola Kasaj (Zhegu). Pas bardhebluve, të cilët edhe në turneun e fundit në Sofje kanë arritur të marrin medalje bronzi, janë renditur “Ortek”, me trajner Julian Caca, dhe Vllaznia me trajner Eljon Puka. Për të rinj, sportistët më të mirë ishin Adela Sula e “Ortek” dhe Arlind Lushaj i “Top Gym Sport”.

Kurse për të rritur Desara Duka e Tiranës dhe Valdet Allaraj i “Ortek”.