ASNN – Një tjetër veprimtari ndërkombëtare e Taekuondosë në versionin “World” do të zhvillohet të dielën. Këtë herë në Sallën Sportive “Fahrie Hoti” në kryeqytet, që do të jetë për fëmijë të moshës 6 deri në 14 vjeç.

Tashmë organizator është ekipi i Studentit me mjeshtër Xhevahir Hysa, ndërsa ky, sipas informacionit që ka dhënë Federata Shqiptare e Taekuondosë (World), është veprimtarie e katërt ndërkombëtare që zhvillohet në vendin tonë me iniciativë personale.

Të parin e ka zhvilluar Julian Caca i “Ortekut”, të dytin, dhe më të madhin e më prestigjiozin Leo Kapri i “Top Gym Tirana”, të treti Xhevahir Hysa i Studentit dhe të katërtin Endri Hoxha, që është njëkohësisht dhe drejtor teknik i Federatës Shqiptare të Taekuondosë.

Në këtë veprimtari pritet të marrin pjesë sportistë jo vetëm nga Shqipëria, por dhe nga Kosova, Mali i Zi, Serbia, Maqedonia, Italia. Në ceremoninë e hapjes së turneut, që do të jetë në ora 12:00, pritet të jenë të pranishëm presidenti i Komitetit Olimpik Kombëtar Shqiptar, Viron Bezhani, Shefi i Strategjive për Sportin dhe Rininë në Ministrinë e Arsimit, Sportit dhe Rinisë, Arjan Konomi, etj.

E në këtë mënyrë, rritja e veprimtarive ndërkombëtare në taekuondonë shqiptare medoemos do të sjellë dhe rritjen cilësore të këtij sporti.