Federata e versionit ITF ka zhvilluar në fundjavën e kaluar kampionatin e të rriturve. “Adi Kuan” renditet e dyta, kurse vendin e tretë e ndajnë “Sport Akademi Manuel” dhe “Ari Master Akademi”, Vlorë. “Ari Master Akademi” Tiranë është “kampione” e Shqipërisë në taekuondo, në versionin ITF, teksa Kampionati kombëtar që ka mbledhur të gjitha grupmoshat është zhvilluar para dy javësh në sallën sportive “Farie Hoti” në Tiranë. Në këtë kampionat, sipas informacionit që ka shpërndarë dje Federata Shqiptare e Taekuondosë, për më tepër drejtori teknik i këtij institucioni, Bujar Çaushi, kanë marrë pjesë 210 sportistë të moshës 5 deri në 45 vjeç.

Kategoritë në të cilën është konkurruar kanë qenë zogjtë, dragonjtë, fëmijët, shpresat, të rinjtë dhe të rriturit. Në përgjithësi garat janë dominuar nga taekuondoistët e “Ari Master Akademi”, që tashmë përveç ekipit të Tiranës ka dhe në Vlorë. Ndaj kjo skuadër ka merituar titullin “kampion”, kurse në vendin e dytë është renditur “Adi Kuan”, që ka merituar dhe titullin “nënkampion”, si dhe në vendin e tretë në pikë të barabarta janë ndarë “Sport Akademi Manuel” e Shushicës në Elbasan dhe “Ari Master Akademi” në Vlorë. Gjyqtarët më të dalluar në këtë veprimtari kanë qenë Artan Prenga nga Durrësi, Jozefin Hila nga Shkodra, Taulant Buzi nga Lushnja dhe Rivelino Çomo nga Tirana.

Po kështu një vlerësim të mirë kanë marrë dhe trajnerët Dorjan Potka e Akademisë së Arteve Marciale në Korçë, Muhamet Pushaj e “Ari Master Akademi” në Tiranë, Xhon Boci e “Taulant Kuan” në Lushnjë, Përparim Kamberi e “Ari Master Akademi” në Vlorë dhe Andon Papajorgjiu i “Art Marcial & Miks”, Kuçovë. Sportistët pjesëmarrës u përballën me gara të teknikave të ndryshme në ushtrime, dyluftime, teknika speciale dhe teknike e forcë. Duke marrë parasysh rregulloren kombëtare dhe ndërkombëtare të “International Taekwondo Federation” ndarja bëhet sipas niveleve të gradës, moshës, gjatësisë dhe peshës.

Rezultatet teknike të

Kampionatit Kombëtar të Taekuondosë (ITF)

Zogjtë (5-6 vjeç)

Prunela Bega (“Ari Master Akademi”, Tiranë)

Dragonjtë (7-8 vjeç)

Darli Hoxha (“Taulant Kuan”, Lushnjë)

Fëmijët (9-11 vjeç)

Për vajza: Alda Shallari (“Ari Master Akademi”, Vlorë)

Për djem: Enjo Bica (“Adi Kuan”, Tiranë)

Shpresat (12-14 vjeç)

Për vajza: Greis Merkoçi (“Ari Master Akademi”, Tiranë)

Për djem: Kris Papadhopuli (“Ari Master Akademi”, Vlorë)

Të rinjtë (15-17 vjeç)

Për vajza: Sara Pushaj (“Ari Master Akademi”, Tiranë)

Për djem: Endri Gjoshi (“Adi Kuan”, Tiranë)

Për brezat e zinj:

Manuel Gaxhja (“Sport Akademi Manuel”, Shushicë-Elbasan)

Të rritur (18-45 vjeç)

Për vajza: Arjan Toro (“Adi Kuan”, Tiranë)

Për djem: Renald Çeliku (“Ari Master Akademi”, Tiranë)

Profesionistë:

Ani Fekollari (Sport Akademi Vorë, Tiranë)

Si ekip: “Ari Master Akademi”, Tiranë