ASNN – Liverpul-Mançester Siti, “paqe” drithëruese. Mbyllet 1-1 supersfida e së dielës në Premier Ligë, Arsenali mban kreun. E ka përligjur epitetin si “dueli i kreut”, duke dhuruar emocione dhe drithërima deri në fund, por sfida midis Liverpulit dhe Mançester Sitit është mbyllur në barazim 1-1 të dielën. Kjo nënkupton se Arsenali mbetet në krye të renditjes, teksa kanë mbetur edhe 10 javë për t’u luajtur në Premier Ligën Angleze. Londinezët kanë 64 pikë, po aq sa edhe Livepuli, që ka një golaverazh më të dobët, ndërsa Mançester Siti mbetet një pikë prapa.
E diela ka sjellë supersfidën e rivaleve për titull, midis Liverpulit dhe Mançester Sitit, që nuk i zhgënjeu pritshmëritë sa i përket spektaklit në fushën e blertë, edhe pse rezultati 1-1 i zhgënjeu skuadrat që kërkonin 3 pikët në vend të një pike të vetme. Skuadra vendase u desh të kapërcente pësimin e një goli në pjesën e parë dhe të barazonte shifrat me fillimin e së dytës, ndërsa duhet theksuar se shpërdoroi edhe shumë raste të volitshme për shënim. Përkundër rrjedhës së lojës, ishin miqtë që kaluan në epërsi pas 23 minutash lojë, nëpërmjet një autori të pazakontë si Xhon Stouns.
Ai finalizoi bukur një skemë të skuadrës së Pep Guardiolës nga një goditje këndi, e ekzekutuar nga Kevin De Bryjne. Me këtë epërsi minimale të Mançester Sitit mbyllen 45 minutat e para, por ato të dytat shohin Liverpulin të barazojë menjëherë shifrat, pasi Darvin Nunjezi u pengua brenda zonës nga portieri Ederson dhe gjyqtari bëri me dorë nga pika e bardhë, aty ku MekAlister u tregua i saktë, duke përshëndetur rrjetën.
40 minutat e mbetura të kohës së rregullt dhe afro 10 minutat shtesë kanë qenë të mbushura me një lojë të luftuar, me raste të shumta për shënim, me emocione dhe drithërima deri në fund, por Liverpuli dhe Mançester Siti e mbyllin në barazim 1-1, çka nënkupton se Arsenali mbetet në krye të renditjes, teksa kanë mbetur edhe 10 javë për t’u luajtur në Premier Ligën Angleze. Londinezët kanë 64 pikë, po aq sa edhe Livepuli, që ka një golaverazh më të dobët, ndërsa Mançester Siti mbetet një pikë prapa.
