ASNN – Trajneri i Kombëtares Kristian Panuçi ka arsye të jetë i shqetësuar. Ai nuk ka një sulmues të spikatur që të zgjidhë skemat e tij taktike. Jo rastësisht ai pranoi publikisht se skemat e tij nuk gjenin përdorim në lojën e përfaqësueses. Nëse në mbrojtje kemi lojtarë të mirë si Hysaj, Gjimshiti, Veseli e ndonjë tjetër që luajnë titullarë me skuadrat e tyre, shoqëruar në prapavijë dhe me dy portierë të nivelit të lartë si Strakosha e Berisha, mesfusha dhe sulmi nuk e kanë potencialin e duhur.

Lojtarët kryesorë kanë minutazh të limituar. Është e habitshme, por lojtarëve që Panuçi u besoi më shumë në Ligën e Kombeve, si Bekim Balaj dhe Eros Grezda, kanë shënuar më pak nga sulmuesit kuqezi. Natyrisht, në ligat e forta e të mëdha të Evropës është e vështirë të realizohen shumë gola, por një sulmues i mirë në një sezon të rregullt duhet të shënojë të paktën 15 gola për të qenë lojtar i mirë. Praktikisht, asnjë nga lojtarët kuqezi nuk e ka ritmin e duhur në pjesën e parë të edicionit për të kapur këtë shifër.

Nga sulmuesit shqiptarë të Kombëtares, nga ata që luajnë në ligat e para, më i miri duket të jetë Azdren Llullaku, që ka shënuar me Astra Xhiurxhiun në kampionatin elitar rumun 5 gola në kampionat dhe 3 në kupë, gjithsej 8 gola. Edhe Fiorin Durmishaj në Greqi ka shënuar në total 7 gola, një ecuri e mirë për një lojtar të ri. Natyrisht, pozitiv është dhe ecuria e Rei Manajt me Albaseten në Segunda Divizion të Spanjës. Lushnjari ka shënuar 5 gola me ekipin e tij në kampionat dhe dy gola në kupë.

Një ecuri e mirë padyshim kjo për një futbollist të ri. Çuditërisht, një nga lojtarët më efikasë duket të jetë sulmuesi veteran Hamdi Salihi, i cili ka shënuar katër gola në ligën e dytë austriake. Një ecuri të mirë ka dhe Myrto Uzuni në Kroaci, me Lokomotivën e Zagrebit, me 5 gola gjithsej. Por, asnjë nga lojtarët shqiptarë e vecmas ata që janë të Kombëtares aktualisht, nuk mund të qughen “bomber”.

Lojtari                         Liga                Ekipi               Gola në kupë                        Gola në ligë  Gjithsej

Azdren Llullaku        Rumani          Astra                           3                      5                      8

Taulant Seferi           Zvicër 2          Vinterthur                  1                      6                      7

Fiorin Durmishaj      Greqi              Panionios                  2                      5                      7

Rei Manaj                  Spanjë 2        Albasete                    1                      5                      6

Myrto Uzuni              Kroaci             Lokomotiva Zagreb  1                      4                      5

Hamdi Salihi             Austri 2          Vjener Nojshtad       1                      4                      5

Sindrit Guri                Belgjikë          Ostende                     2                      1                      3

Eros Grezda              Skoci              Gllasgou Rejnxhërs            0                      2                      2

Sokol Cikalleshi       Turqi               Gëztepe                     2                      0                      2

Xhakomo Vrioni       Itali                 Venecia                     0                      1                      1

Bekim Balaj               Rusi                Akhmat Grozni         1                      0                      1