ASNN – Ministria e Arsimit, Sportit dhe Rinisë, në bashkëpunim me Universitetin e Sporteve dhe Institutin e Kërkimit Shkencor, kanë prezantuar ditët e fundit studimin e kryer për sportistët e rinj elitarë, kandidatë për në Lojërat Mesdhetare “Tarragona 2018” dhe Lojërat Olimpike “Tokio 2020”. Drejtori i Institutit të Kërkimit Shkencor, Arben Kaçurri, ka treguar se është punuar prej një viti për këtë studim.
“Projekti, – thotë Kaçurri, – ka nisur në mars dhe në finalizuar në dhjetor 2017, ndërsa tani ishte koha e prezantimit. Janë marrë në studim dhe krahasim me botën futbolli, basketbolli meshkuj dhe femra, volejbolli, atletika, mundja, boksi, çiklizmi, xhudo dhe të tjerë. Dhe ajo që del është se përgatitja, apo stërvitshmëria nuk është e mjaftueshme dhe në ato nivele që do të kërkonim për të arritur në podiume.”
Dhe, me tabela, Kaçurri ka treguar se vetëm atletika është në nivele të pranueshme, kurse të tjerët, që bëjnë të ashtuquajturin sport profesionist, janë të barasvlershëm me njerëzit normalë. Që do të thotë se kërkojmë profesionalizëm nga sportistë që vrapojnë sikur të ishte një njeri normal, apo nga ata që nuk kanë dhe fuqinë maksimale për ta bërë këtë.
Në takimin e djeshëm kanë qenë të pranishëm figura si Albert Karriqi, Astrit Hafizi, Enkelejda Lleshi, Sulejman Demollari, Nevil Dede, Dritan Babamusta, Alfred Tahiraj, Korab Llazani, Edmond Kabashi, Jani Nano, Gjergji Ruli, Nikolin Dionisi, Izmir Smajlaj, Tonin Binoshi, Greta Kovaçi, Jonuz Tufa, Labo Çapo, Erind Cara, Sokol Bishanaku, Suela Haxhija, etj.
Madje dhe sportistë. E ajo që duket është fakti se tashmë për të përfituar trajtimet ushqimore, apo dhe financat nga “grant”-i mundet të ketë dhe norma për të kapërcyer. Sepse i gjithë studimi, apo dhe ajo çka u tha aty, duket se ecën paralel me shprehjen “i bie pragut ta dëgjojë dera”. Për të mos thënë që mund të jetë dhe një paralajmërim për përgjysmim të grandeve deri në zero lekë për federata të veçanta.
