ASNN – Ditën e premte, Bashkia e Shkodrës do të miratojë marrëveshjen mes saj dhe Federatës Shqiptare të Futbollit, në lidhje me rikonstruksionin dhe përdorimin e stadiumit “Loro Boriçi”, për të cilën ka kohë që diskutohet në distancë midis pushtetit vendor të qytetit verior dhe organizmit që qeveris “topkëmbën” shqiptare. Më në fund palët duket se kanë arritur akordin e duhur për pikat e kësaj marrëveshje dhe kushtet e saj.
Akt-marrëveshja midis Federatës Shqiptare të Futbollit dhe Bashkisë, që ka mbajtur peng edhe vijimin e punimeve në stadiumin “Loro Boriçi”, pritet të miratohet në mbledhjen e së premtes të Këshilli Bashkiak i Shkodrës. Kjo aktmarrëveshje është përfshirë në rendin e ditës për mbledhjen e datës 4 dhjetor të Këshillit Bashkiak. Sipas burimeve pranë këtij këshilli, mësohet se, më në fund, mes FSHF-së dhe Bashkisë së Shkodrës është gjetur akordi për nënshkrimin e marrëveshjes.
Ndër 12 pikat që do të ketë rendi i ditës për këtë mbledhje, pikërisht pika 10 e konfirmon këtë gjë, teksa në të thuhet: “Projekt-Vendim: Për miratimin e marrëveshjes mes Bashkisë Shkodër dhe Federatës Shqiptare të Futbollit “për rikonstruksionin dhe përdorimin e stadiumit “Loro Boriçi”.” Miratimi i marrëveshjes do të bënte që punimet në “Loro Boriçi” të vijojnë tashmë me ritëm të përshpejtuar. Tashmë duket se gjithçka është mbyllur.
Dhe pas marrjes së miratimit nga ky Këshill, kryebashkiakja Ademi do të vendosë firmën në marrëveshje sepse mesa duket stadiumin do ta marrë në administrim institucioni që ajo drejton dhe jo Federata siç u mendua kohët e fundit. Presidenti i FSHF-së, Armando Duka, pati deklaruar një muaj më parë se Stadiumi i rinovuar i Shkodrës pritet të jetë gati në shkurt të 2016-s, ndërsa Kryeministri Edi Rama, i cili inspektoi punimet në këtë impiant sportiv, kërkoi më 2 nëntor përshpejtimin e punimeve nga ana e kompanisë që e ka marrë përsipër.
