ASNN – 22 prilli pritet të jetë dita kur futbolli kontinental do të sqarojë shumëçka sa i përket fatit të këtij sezoni, po ajo që po bëhet gjithnjë e më e qartë është se nuk nuk ka as Ligë të Kampioneve e as Ligë të Evropës, pa përfunduar kampionatet kombëtare. Kështu mendon anëtarja e Këshillit të FIFA-s, Evelina Kristilin, e cila ka lënë të kuptohet se plani është që të shtyhen ndeshjet e dy veprimtarive kontinentale të klubeve deri pasi të kenë përfunduar kampionatet kombëtare.
Të gjitha sportet janë pezulluar prej më tepër se një muaji për shkak të epidemisë së koronavirusirt dhe ende nuk është e qartë se kur do të rinisë sezoni 2019-2020. Raportohet se, fillimisht, do të përmbyllen kampionatet vendore në të gjitha vendet e kontinentit, për të vijuar më pas me Ligën e Kampioneve dhe Ligën e Evropës, në një format të ri, ku ndeshjet do të luheshin në fushë asnjanëse dhe me vetëm një takim dhe jo me dy me vajtje-ardhje.
“Shëndeti dhe siguria vijnë së pari dhe janë më të rëndësishmet, – ka deklaruar Kristilini për Radion “Punto Nuovo”. – Kampionatet e 5 vendeve më të rëndësishme dëshirojnë t’i përfundojnë sezonet e veta përkatëse, por askush nuk dëshiron të vendosë pa pëlqimin e qeverive dhe autoriteteve vendase.” Disa klube kanë provuar t’i rinisin stërvitjet, por janë ndaluar nga vendimet e qeverive, si, për shembull, në Itali, ku lojtarët nuk mund të thirren për të stërvitur të paktën deri më 4 maj 2020.
“Kjo gjë varet nga qeveritë në secilin vend, – ka vijuar italiania 64-vjeçare. – Në teori, mund të jetë e mundur të rifillojnë stërvitjet pasi të ketë skaduar ky dekret, por nuk e di nëse do të jetë e mundur ta bëjnë këtë në të gjithë Evropën në të njëjtën kohë. Ajo wë unë di është se do të ketë një takim nëpërmjet video-konferencës më 22 prill me të gjithë përfaqësuesit e 55 Federatave të UEFA-s dhe, një ditë, pas një mbledhjeje të Komitetit Ekzekutiv.”
“Në këtë mënyrë, ne do të dimë se çfarë u vendos dhe u diskutua me Federatat”, – ka shtuar zyrtarja e lartë e FIFA-s. Shumica e kampionateve nëpër vendet e Evropës pritet t’i rinisin sezonet në muajin maj. Në Itali thuhet se sezoni do të rifillojë më 31 maj dhe ndeshjet do të zhvillohen çdo 3 ditë për ta përmbyllur sezonin më 12 korrik 2020. Kësisoj, Liga e Kampionëve dhe Liga e Evropës pastaj mund të përmbyllen nga mesi i gushtit.
“Ekziston një plan, një strategji, pasi ne jemi duke punuar me UEFA-n dhe Shoqatën Evropiane të Klubeve (ECA), – ka pohuar Kristilini. – Përparësia është shëndeti, më pas rinisja e sezonit dhe, rrjedhimisht, edhe përfundimi i veprimtarive evropiane në muajin gusht. Ekziston një problem shumë i madh dhe i ndërlikuar në lidhje me organizimin, por Presidenti i FIFA-s, Xhani Infantino, konfirmoi se do të ketë ndihmë për ata klube që kishin probleme ekonomike gjatë kësaj periudhe.”
