ASNN – Ishte folur prej kohësh, por tanimë është bërë realitet, edhe pse për një afat të përkohshëm. FIFA ka njoftuar të premten se skuadrat e futbollit do të lejohen të bëjnë deri në 5 zëvendësime të lojtarëve në ndeshje. Me rregulloren aktuale, në ndeshje të zakonshme kampionati, skuadrat lejohen të bëjnë 3 zëvendësime, por është vendosur për këtë ndryshim si masë e përkohshme për të ndihmuar skuadrat që të përballojnë më lehtë ndeshjet pas pushimit të gjatë për shkak të virusit korona.
Ndryshimi i këtij rregulli do të lejohet në të gjitha veprimtaritë që do të përfundojnë deri në fund të vitit. Por u takon organizatorëve të këtyre veprimtarive të vendosin nëse do ta zbatojnë këtë rregull të ri, ka sqaruar organizmi që qeveris futbollin botëror. Vendimin për të lejuar 5 zëvendësime e ka marrë Bordi Ndërkombëtar i Shoqatave të Futbollit (IFAB), i cili është organizmi përgjegjës për rregullat e futbollit. FIFA e pati kërkuar një ndryshim të tillë për të mbrojtur shëndetin e lojtarëve.
Por, për të shmangur abuzimin me këtë rregull të ri, sidomos sa u përket vonesave të qëllimshme, klubet kufizohen që këto 5 zëvendësime t’i bëjnë në 3 raste, për të mos ndikuar në rrjedhën e lojës. Zëvendësime lejohen edhe në pushim mes dy pjesëve të lojës. Para pak ditësh, pas një kërkese të disa federatave të ndryshme të futbollit, FIFA kishte bërë një propozim, që, pas rifillimit të futbollit, të pezulluar nga hëpërhë nga epidemia e virusit korona, të lejoheshin 5 zëvendësime gjatë ndeshjes.
Dhe Bordi i Shoqatës Ndërkombëtare të Futbolli (IFAB), e ka pranuar këtë propozim të bërë, për të ndryshuar përkohësisht rregulloren e futbollit. E gjitha kjo bëhet për shkak se në një kohë të shkurtër do të zhvillohen një numër i madh ndeshjesh, si dhe në temperatura të larta. IFAB-i ka bërë të ditur se vendimi u mor për shkak të kërkesës së FIFA-s, që është anëtare e tij bashkë me Federatën Angleze, Skoceze, Irlandeze dhe Uellsiane të Futbollit.
Rregulli do të lejohet vetëm në veprimtaritë që pritet të përfundohen deri më 31 dhjetor të këtij viti, që do të thotë se do të përdoren vetëm në sezonet aktuale të kampionateve dhe kupave vendase dhe Ligës së Kampioneve e Ligës së Evropës, por jo edhe në sezonin 2020-21. Gjithashtu u konfirmua se do të bëhen vetëm 3 ndërprerje për zëvendësimet, që kuptohet se trajnerët duhet të bëjnë më shumë se një zëvendësim njëkohësisht.
Është diskutuar edhe për Sistemin e Ndihmës-Gjyqtarit të Videos (VAR), teksa në vendet ku është përdorur deri tani, mund të hiqet përkohësisht, ndërkohë që për këto ndryshime do të jenë vetë federatat që do të vendosin, nëse do i aplikojnë apo jo. Por përdorimi i këtij sistemi ngre çështjen etike, të standardeve të dyfishte brenda një sezoni, pasi një numër vendesh e kanë përdorur atë gjatë sezonit aktual dhe nuk do të ishte e drejtë të mos vazhdonin ta përdornin tani.
