ASNN – UEFA ka vendosur që finalja e Ligës së Kampioneve, për sezonin 2021-2022, të luhet në Paris. Organizmi që qeveris futbollin evropian ndëshkon Rusinë për luftën e nisur nga Ukrainës, duke ia hequr të drejtën Shën Pjetërburgut për të luajtur atje aktin final të Ligës së Kampioneve. Kështu, finalja e veprimtarisë më prestigjioze të klubeve të kontinentit do luhet në Paris, në Stadiumin “Stadë dë Francë”, më 28 maj 2022.
Lajmi është publikuar nga UEFA, nëpërmjet një komunikate zyrtare, në përfundim të punimeve të mbledhjes së jashtëzakonshme të Komitetit Ekzekutiv, të zhvilluar të premten. Sipas këtij vendimi, stadiumi i Shën Pjetërburgut, ku ishte përcaktuar më parë, nuk mund të jetë vendi ku do të luajnë aktin final të Ligës së Kampioneve, dy skuadrat finaliste të saj, për shkak të sulmit ushtarak të Rusisë të ndërmarrë ndaj Ukrainës.
Gjithashtu, organizmi më i lartë evropian i futbollit, ka njoftuar se ndeshjet në fushën e tyre, të klubeve dhe përfaqës ruse dhe ukrainase në veprimtaritë e UEFA-s, do të luhen në fusha neutrale, deri në një njoftim të ri. Kështu, për të 3-tin vit radhazi, finalja e Ligës së Kampioneve ndryshon stadium. Në 2020 duhej të zhvillohej në Stamboll, por për arsye të epidemisë së “Covid-19”, u spostua në kryeqytetin e Portugalisë, Lisbonë.
Në 2021-shin, gjithnjë për shkak të “Covid-19”, Stambolli nuk pranoi ta luante finalen atje, dhe ndeshja u zhvillua sërish në Portugali, por në Oporto. Këtë vit, do të jetë Franca ajo që do të zëvendësojë Rusinë. Parisi nuk e pret finalen e Ligës së Kampioneve që nga 2006.
