ASNN – Brazili ka nisur përgatitjet për Kupën e Amerikës (Copa America) në qendrën e grumbullimit në Rio de Zhaneiro. Zëvendësi-trajneri përfaqësueses braziliane, Kleber Zhavier, është shprehur se nuk e shikon skuadrën e tij si të favorizuar. Por ai thotë se, së bashku me trajnerin Tite po punojnë për të krijuar një skuadër që të arrijë në finale e të fitojë edhe trofeun. Prej dy ditësh, Brazili ka nisur grumbullimin në kompleksin e futbollit “Granja Komprai” pranë Rio de Zhaneiros, në përgatitje të Kupës së Amerikës.
Nën drejtimin e trajnerit Tite dhe ndihmësit të tij, Kleber Zhavier, futbollistët ditën e parë kanë kryer ushtrime në palestër, në mënyrë individuale. Më pas, ata kanë nisur ushtrimet me topin në fushë. Zëvendës-trajneri i Brazilit, Zhavier, thotë se nuk është aspak i shqetësuar “nga zërat që flasin se ne jemi më të favorizuar”. Ata po punojnë për të krijuar një strategji, që të jetë më e mirë se e kundërshtarëve. “Gjermania dhe Spanja, të cilët ishin favoritët për Botërorin 2018, nuk fituan”, – tha Zhavieri.
“Shqetësimi im nuk është çështja e favorizimeve, – vijoi ai duke folur gjatë një konferencë shtypi. – Ne duhet të respektojmë dhe të njohim kundërshtarët. Të punojmë për një strategji në mënyrë që ne të mund të bëjmë më mirë se skuadrat e tjera”. Gjatë këtyre ditëve, Tite dhe Zhavieri do të mundohen të punojnë sa më shumë për të harmonizuar futbollistët me njëri-tjetrin, pasi gjërat evoluojnë dhe të gjithë duhet të përshtaten me formatin e ri.
“Është shumë më e lehtë për të gjithë që të punojnë sipas rutinës. Por duke parë evolucionin në futboll, na duhet të krijojmë një tjetër marrëdhënie në mjedisin tonë të punës. lojtarët duhet të përshtaten me idetë e reja që do të përcjellim” – shtoi më tej Zhavieri. “Qëllimi ynë është të luajmë mirë në Kupën e Amerikës dhe të arrijmë në finale që të fitojmë edhe titullin”, – përfundoi ai.
