Pasi ka bërë homazhet për legjendën e shtangës kuqezi, Presidenti i Federatës Shqiptare të Peshëngritjes, Elez Gjoza, deklaroi: “Ymer Pampuri është simbol i sportit shqiptar dhe i peshëngritjes. Ai ngriti lart emrin e Shqipërisë dhe sportit shqiptar, ndërsa në Olimpiadën e Mynihut u shpall kampion bote në stilin e forcës dhe, njëkohësisht, dhe rekordmen Olimpik.”
“Ai është nderuar nga Ministria e Arsimit dhe Sportit me titullin “Mjeshtër i Madh”, ndërsa ne kemi propozuar për t’u bërë Qytetar Nderi i Tiranës dhe këtë ia kërkojmë Bashkisë së kryeqytetit, – ka vijuar ai. – Pa thënë që kemi bërë propozimin tonë për titullin “Nderi i kombit”. Pritet vetëm vendimi i Presidentit të Republikës. Ne si Federatë i kemi bërë të gjitha gjërat që Ymer Pampuri të nderohet.”
Ndërsa ish-trajneri Faruk Kalleshi, tha: “Ne jemi bashkohës me Ymerin. Stërvitjen, rezultatet i kemi të gjitha të përbashkëta. Edhe pse ishim në pesha të ndryshme kryenim bashkë stërvitjen. Madje edhe në ekipin kombëtar kemi qenë bashkë. Për mua ai është burim frymëzimi për brezin e ri”. Një tjetër ish-bashkëkohës i Pampurit, Ferid Berberi, ka rrëfyer gjithashtu kujtimet me rekordmenin olimpik.
“Fillimet i kemi së bashku si sportist, më pas unë kam qenë trajner i tij me ekipin kombëtar, – ka thënë ai. Ka qenë sportist i mirë, bënte fort stërvitje, punonte shumë. Ishte shumë i shkathët e kjo ndoshta nga që është marrë dhe me cirkun”. Ndërkohë, ka qenë therës apeli i Erkand Qerimajt, i cili ka patur një propozim konkret sa u përket figurave të sportit.
“U bëj thirrje mediave, instancave të larta të sportit dhe të Qeverisë që t’i japin meritat e duhura të gjitha figurave të sportit kur janë gjallë e jo pas vdekjes, – ka thënë shtangisti i njohur shqiptar, i cili është ndër të paktët që mbajti stafetën e Pampurit, duke fituar tituj ndërkombëtarë. – Sepse kur vdesin ata nuk shohin më gjë. E këtu bëhet fjalë edhe për pensionin apo gjithçka tjetër që ka lidhje me ta.”
