ASNN – Xhudo e Kosovës s’lë turne pa fituar, Nora Gjakova mposht finalisten e Olimpiadës dhe merr medaljen e artë në Tbilisi. Xhudo e Kosovës vijon të korrë suksese në veprimtaritë ndërkombëtare, duke mos u lënë radhë shteteve të tjera. Kudo ku shkelin xhudistët e trajnerit Driton Kuka ka vetëm medalje, e me shumicë madje medalje ari.

Të premten ishte radha e Nora Gjakovës të shkruajë një tjetër faqe suksesi në karrierën e saj, sepse fitoi medaljen e artë në Çmimin e madh të Tbilisit në Gjeorgji, një veprimtari me vlerë pikësh olimpike dhe me pjesëmarrje të gjerë. Kampionia kosovare garoi në peshën trupore deri në 57 kg, duke bërë një paraqitje mbresëlënëse, pasi i kapërceu kundërshtaret e saj një e nga një.

Për të arritur në finale përballë finalists olimpike, brazilianes Rafaela Silva, të cilën e mundi me “ippon”. Një triumf i madh dhe një medalje ari plotësisht e merituar për xhudisten e talentuar shqiptare nga Kosova. Para se të mbërrinte në finale, Gjakova kaloi kundërshtare shumë të vështira si turken Ëzerler të cilën e mundi me “ippon”, pastaj në çerekfinale mposhti gjeorgjianen Eteri Liperteliani.

Dhe në gjysmëfinale theu holandezen Sana Verhagen. Medalja e artë për Nora Gjakovën është në vazhdën e sukseseve të vitit 2018 që ajo ka arritur në Kampionatin Evropian vitin e kaluar si dhe në Lojërat mesdhetare të Tarragonës në Spanjë. Në turneun e Tbilisit, xhudoja kosovare do të përfaqësohet edhe me Loriana Kuka, e cila do të garojë ditën e diel.

Duhet theksuar se federata e xhudos së Kosovës pretendon se 5 sportistë të saj e kanë siguruar tashmë kualifikimin për në Lojërat Olimpike të Tokios në vitin 2020.