ASNN – Xhudistja më e mirë e trevave shqipfolëse spikati menjëherë në Evropianin e kësaj kategorie, që po zhvillohet në Poloni. Në Pallatin e Sportit në Varshavë, Kelmendi ia doli të kalojë në finalet e turneut kontinental dhe të marrë medaljen e artë, në peshën 52 kilogramë. Turin e parë, Majlinda Kelmendi e kishte kaluar me zero impenjim, pra “aforfe”, ndërsa ka vazhduar më pas me fitore të vërteta me britaniken Çellsi Xhils dhe me zviceranen Evelinë Tshop.
Xhudistja kosovare arriti të eliminonte në gjysmëfinale portugezen Zhoana Ramosh, duke spikatur me strategjinë në garën polake. Në finalen e kategorisë së peshës trupore deri në 52 kilogramë, kampionia evropiane, botërore dhe olimpike u përball me rusen Alesia Kuznjecova, të cilën e mundi duke u ngjitur në shkallën më të lartë të podiumit.
Madje fitore me “Ippon”, ose ndryshe “tuç”, në zhargonin popullor. Ndërkohë, Nora Gjakova fitoi medalje bronzi, ndërsa mbeti jashtë zonës së medaljeve kosovarja tjetër, Distria Krasniqi, që u mposht në tapet nga Gili Kohen. Për Shqipërinë, në këtë veprimtari konkurrojnë Jon Vrenozi dhe Armando Mollosmani në peshën 73 kg, të cilët shoqërohen nga trajneri Erind Cara.
Tashmë sipas ligjeve të Republikës së Kosovës, Kelmendi për titullin e “kampiones së Evropës” përfiton 20 mijë euro shpërblim, kurse Nora Gjakova, për medaljen e bronztë, 14 mijë euro.
