ASNN – Rrjeti i Radio-Televizionit Shqiptar vazhdon të sjellë për sportdashësit emocionet e veprimtarive madhore sportive dhe aktualisht janë dy Kampionate Botërore të Femrave, ai i volejbollit dhe ai i basketbollit, që po transmetohen në dy platformat tona, atë tokësore dhe atë dixhitale. Ndërkohë që basketbolli sapo ka nisur, volejbolli ka mbyllur fazën e grupeve, duke përcaktuar 16 skuadrat që vijojnë më tej.
Kampionati Botëror i Volejbollit për Femra, i cili po zhvillohet në Itali, ka mbyllur të dielën fazën e parë të ndeshjeve në grupe dhe nga 24 skuadra që e nisën para 6 ditëve, tashmë kanë mbetur vetëm 16, të cilat në këtë fazë të dytë, do të ndahen në dy grupe me nga 8 skuadra secila. Në përfundim të turit të 16-shes, 4 të parat e çdo grupi kualifikohen për në çerekfinale.
Në grupin e parë të turit të 16-shes do të përballen me njëra-tjetrën Kina, Italia, Republika Dominikane, Japonia, Belgjika, Kroacia, Azerbajxhani dhe Gjermania. Ndërsa në grupin e dytë ndodhen SHBA, Brazili, Rusia, Serbia, Holanda, Bullgaria, Turqia dhe Kazakistani.
Ndeshjet e Botërorit të Volejbollit të Femrave po sillen për sportdashësit drejtpërdrejt nga Rrjeti i Radio-Televizionit Shqiptar, që prej dy ditësh ka nisur transmetimin edhe të një tjetër veprimtarie madhore sportive, siç është Kampionati Botëror i Basketbollit për Femra, që po mbahet në Turqi dhe ku po marrin pjesë 16 skuadrat më të mira të botës.
Ndeshja e transmetuar të dielën në mbrëmje nga Rrjeti i Radio-Televizionit Shqiptar ishte ajo SHBA-Serbi, që u fitua nga amerikanet me rezultatin 94-74. Dy Kampionatet Botërore të Femrave, ai i volejbollit dhe ai i basketbollit, po transmetohen duke u alternuar në dy platformat tona, atë tokësore dhe atë dixhitale.
