Andi Kris Proda, organizatori i turneut të volejbollit miks, meshkuj e femra bashkë, ka shpjeguar se që nga 26 shtatori në Sallën Sportive “Farie Hoti” ka nisur edicioni i tij i tretë. Në këtë kampionat marrin pjesë Skanderbeg, që është kampione në fuqi, Alfa, Vip Volej, Tepelena, Nekst, Tibo, Alfa Volej, Rize, Dhe Uall, Dragon, Polis, Metaraka, Netrade, Eklips, Krutja dhe Dhe Blokbusters. “Kampionati ynë i volejbollit miks është një event i përvitshëm që zhvillohet në Tiranë, – ka shpjeguar ai. – Këtë vit ka nisur më 26 shtator, ndërsa data e përfundimit të veprimtarisë nuk është përcaktuar ende. Është një kampionat volejbolli amator ku ekipet përbëhen nga tre meshkuj dhe tre femra.”
“Në këtë kampionat vajzat dhe gratë kanë përparësi, pasi ato mund të jenë më të shumtë në ekip se sa djemtë, – ka theksuar Proda. – Pjesëmarrja është nga mosha 15-65 vjeç, ndërsa veprimtaria është krejtësisht social, atje ku synohet barazia gjinore, sportet miks mes dy gjinive dhe kultura sportive.” Organizatori ka bërë të ditur se është një nga të vetmet aktivitete sportive në të cilat dy gjinitë ndeshen si të barabarta. “Synimi kryesor dhe vizioni njëkohësisht është zhvillimi i një kampionati kombëtar miks mes ekipeve amatore, të cilave u lejohen të kenë edhe dy profesionist në fushë”, – ka sqaruar ai.
“Kështu vitin e kaluar ka marrë pjesë Erblina Bici, që është kampione e Shqipërisë me Barleti Volejin, – ka pohuar ai. – Pa harruar që ka luajtur edhe Arjola Prenga, e cila luan me sukses në Norvegji, apo dhe Mjeshtrja e Merituar e Sportit, Ela Tase. Vitin e kaluar kampionati ka zgjatur një muaj, ndërsa në të kanë marrë pjesë edhe shumë institucione si Ambasada e Shteteve të Bashkuara të Amerikës, Raiffeisen Bank, Sigal Unika Grup Austria”. Proda ka shpjeguar dhe rregulloren, ndërsa 16 ekipet pjesëmarrëse ndahen në grupe, atje ku luajnë me njëra-tjetrën me eliminim direkt.
“E kjo deri në fazën finale, atje ku shpallet ekipi “kampion” dhe dy lojtarët më të mirë të aktivitetit”, – ka përfunduar Proda, i cili së bashku me Artur Gjyrykun janë organizatorët e veprimtarisë, që ka katër vjet që bëhet. Eventi është komplet me vetëfinancim dhe shumë herë ka patur sponsor të ndryshëm, të cilët kanë dhënë çmimet e para të shpërblyera në lekë.
